A l’escasença de la seuna 82ena amassada, l’Union Academica Internacionala encarguèt l’Institut d’Estudis Catalans de la contunhacion del projècte Còrpus dels Trobadors qu’èra estat iniciat e bailejat per Ramón Aramon i Serra (en collaboracion amb Aurelio Roncaglia, en partir de 1982), puèi, mai recentament, pel Prof. Alberto Várvaro. Foguèt lo Prof. Aurelio Roncaglia que convertiguèt aquel projècte en un modèl per l’ensem dels estudis occitans.
L’òbra dels trobadors, considerada d’aquel temps — e uèi encara — a l’auçada dels classics, constituís un dels elements fondamentals de l’istòria de la cultura europenca. Lo prètzfach inicial del projècte, en 1962, èra doncas de porgir una edicion fisabla de l’ensem de lor produccion qu’èra esparpalhada dins edicions individualas, d’accès plan sovent malaisit. Se revelèt que lo nivèl dels estudis e de las edicions disponiblas a aquela epòca permetián pas de complir aquel prètzfach, aital foguèt creada la colleccion « Còrpus dels Trobadors », per tal de menar coma cal los estudis de basa necessaris e puèi de los publicar.
Solide, consideram non solamant lor lirica mas la cultura tota dels trobadors, coma un dels elements fondamental e fondator de l’idiosincrasia europenca, que dèu sempre èsser analisada dins una perspectiva rigorosa, universala e actuala ; plan urosament, la recèrca faguèt progrèsses immenses long de las cinc darrièras decenias. Fa pas cap de dobte que l’aprigondiment de nòstras conoissenças sus la tradicion dels trobadors reçauprà, dins los temps a venir, lo meteis acuèlh que pel passat. En mai, a l’escasença d’aquesta novèla etapa, amb lo pairinatge e la gestion de l’Institut d’Estudis Catalans, la promocion e la publicacion d’estudis se perseguiràn amb la meteissa rigor e lo meteis nivèl qu’an caracterizat lo nòstre projècte dempuèi la començança.
D’en primièr, volèm metre en exèrg l’importància dels trobadors dins l’istòria europenca e fomentar los estudís sus lor impacte e sus lor recepcion, que son tan pertinents dins la perspectiva dels estudis literaris actuals. Aital, l’analisi de l’emprenta dels trobadors dins la tradicion europenca constituirà un axe novèl de nòstras recèrcas ; acordarem doncas una atencion ben particulara als trobadors catalans coma a la tradicion literària occitana en Catalonha, país qu’es totjorn estat, dempuèi sas originas, ligat d’un biais pro estrech a la cultura occitana.
A l’ora d’ara, los estudis occitans se son desenvolopats dins lo monde sencer. Malurosament, las edicions son encara d’un accès plan malaisit, que son sovent plan ancianas e, en causa de lor tiratge limitat, pervenián pas qu’a las bibliotècas o als centres de recèrcas ont se trobava un interès per aqueles subjèctes. Lo pairinatge economic e los mejans meses a la disposicion del projècte per l’Institut d’Estudis Catalans nos permeton de nos engatjar dins aquela escomesa.
Lo temps ara passat e lo gras d’excelléncia atengut dins los trabalhs sus la matèria occitana fan que nos es possible, a l’ora d’ara, d’afrontar l’avenidor amb perspectivas nòvas, emai amb apleches novèls. Aquí perque avèm creat aqueste siti oèb, elaborat per tal de reprodusir, pels cercaires e pels legeires interessats, totas aquelas edicions encara d’actualitat o utilas per un trabalh filologic e per quinas poguèrem obténer las autorisacions correspondentas.
Es clar que l’Internèt es vengut un aplech fantastic e indispensable, que nos pòt liurar a domicili los contenguts los mai incredibles : facsimils de manescrichs, reproduccions de libres introbables, de revistas ancianas malaisidas d’accès, catalògs de bibliotècas, basas de donadas… Amb aqueste siti oèb especific pel Còrpus dels Trobadors, esperam contribuir a sa conoissença tant coma a la recèrca, en porgissent als especialistas de la cultura occitana e als legeires apassionats pels trobadors l’ensem de las ressorgas que la tecnologia, lo trabalh e la passion an meses entre nòstras mans. Esperam que lor utilitat per la recèrca e la cultura compensarà lo nòstre trabalh.
Imatge cortesia de la Biblioteca de Catalunya ms. 146 f. 50 r
