Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Codi: 156,004=097,002 Autor: Falquet de Romans, Blacatz Gènere: Échange de coblas Número: X

 

En chantan voill qe·m digatz

I	1	En chantan voill qe·m digatz,
		Segn’en Blacatz,
		Se vai l’emperaire
		Vas la terra on deus fon natz,
	5	Vos qe·n pessatz
		O qe·n cuiatz faire ;
		Q’eu volrai retraire
		Zo que·us n’er veiaire.
		Se·l viatge vos agenza
	10	O si·os platz la remanenza ;
		C’ancor non a gaire
		Q’il contessa de Proenza
		Diç que per sa entendenza
		Eratz gais e chantaire.
		En Blacatz li respondet en aquesta cobla:
II	15	En Falquet, be voill sapçatz
		Q’eu sui amatz
		Et am ses cor vaire
		Leis en cui es fina beutatz
		E gais solatz ;
	20	Q’ela·m pot desfaire
		E, se·s vol, refaire,
		Qe de prez es maire ;
		Ab sen et ab conoissenza
		Et ab bels dichz de plaisenza
	25	Sap cor de cors traire.
		Eu farai ma penedenza
		Zai antre mar e Durenza
		Apres de·l seu repaire.