Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,077 Autor: Giraut de Bornelh Gènere: Sirventes Número: LXVII

 

Tals gen prezich' e sermona

I	1	Tals gen prezich’e sermona
		C’a cor fals e maltalen
		E tals altrui ochaizona
		Que sa colpa no repren
	5	E tals fera peitz de serpen
		Que so coratg’empreizona,
		Tals port’umil vestimen
		C’a volontat felona.
II		Tals l’altrui tort do perdona
	10	Que sa part no·n get’al ven
		E tals molt clam’e tensona
		Que no n’a de drech nien
		E tals sos fachs fai folamen
		Que parla gen e razona,
	15	Tals semena ben e gen
		So blat que no·l meissona.
III		Tals a gent’e fort persona
		Ca sofracha d’ardimen,
		Tals son amic abandona
	20	Que n’a sofracha soven
		E tals promet que mal aten
		E tals te pro que pauc dona
		E tals gran servizi pren
		Que mal lo gazardona.
IV	25	Tals cud’aver sazo bona
		A cui en vai malamen,
		Tals ponh fort et esperona
		C’a so chaval trop corren
		E tals cuda far mantenen
	30	Que s’a speransa bretona
		E tals par anar trop len
		Que sos fachs desazona.
V		Tals quer d’emperi Corona
		Que nostra fe mal defen,
	35	E·l pap’entre tertz’e nona
		S’endorm aissi planamen
		Qu’encontra sarrazina gen
		No vei baro que s’opona,
		Ans an per lor malvolen
	40	Qui d’aisso mot lor sona.
VI		Jesucristz, per salvar la gen,
		Portet d’espinas corona,
		E·l papa so monimen
		Malamen abandona.
VII	45	L’antecristz, cut, venra breumen,
		Tan aonda gens felona;
		Car totztems vei c’om aten
		La ploia, can fort trona.