Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,026 Autor: Giraut de Bornelh Gènere: Chanson religieuse Número: LXXIV

 

Be vei e conosc e sai

I	1	Be vei e conosc e sai,
		Per so car proat o ai,
		Que, qui plus el segl’estai,
		Plus i a dol et esmai,
	5	E cel que per peitz mal trai
		Es fols e plus, car no·s trai
		Lai on sap que totztems mai
		Viura ses dol e ses pena.
II		Senher Deus drechurers, chars,
	10	Umils, resplandens e clars,
		Entre mos nescis pensars
		Sui endevengutz liars!
		Mas er conosc que l’amars
		D’aquest segle s’es amars;
	15	C’om n’es fols e tan avars,
		Per que n’a pois dol e pena.
III		C’oi non es om altz ni bas
		Que per la greu mort no pas;
		E donc pensa de tu, las!
	20	Que ja saps be que morras
		Et ades vas la mort vas,
		E s’ans c’om te met’el vas,
		No·n pensas, ja no seras
		Nuls tems ses dol e ses pena.
IV	25	Vols que·t done bo conort?
		Fai de to cor feble fort
		Et aissi de to gran tort
		Trobaras ab Deu acort!
		Si non o fas, tem que·t port
	30	Tos fols volers a tal port
		Que viuras apres la mort
		Totztems ab dol et ab pena.
V		C’om no viu dos jorns ensems
		Ses trebalh e pois falh tems
	35	C’om mor doloiros ab gems
		E put plus mil tans que fems;
		E si vols venir per tems
		A Deu ni l’amas ni·l tems.
		Ja no seras de joi sems
	40	Ni trairas mais dol ni pena!