Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,005 Autor: Berenguier de Palazol Gènere: Canso Número: II

 

De la gensor qu'om vey', al mieu semblan

I	1	De la gensor qu'om vey', al mieu semblan,
		On nueg e jorn velh e pens e cossir,
		Mi vuelh lunhar, si·l cor mi vol seguir,
		Ab tal acort que mais no·l torn denan,
	5	Quar longamen m'a tengut deziron
		Ab belh semblan, mas tan dur me respon
		Qu'anc jorn no·m volc precx ni demans sofrir.
II		Ja mais miei huelh ab los sieus no·s veyran,
		S'a lieys no plai que·m man a se venir ;
	10	Qu'on plus la vey, plus m'auci de dezir,
		Et on mais l'am, mais y fatz de mon dan ;
		E·l non vezer me languis e·m cofon ;
		E pus no·m plai ren als que si'al mon,
		Ab pauc no·m lays de vezer e d'auzir.
III	15	Ai ! belha dona, ab belh cors benestan,
		De bel semblan e de gent aculhir,
		A penas sai de vos mo mielhs chauzir,
		Si·us vey o no, o si·m torn, o si m'an :
		Non ai saber ni sen que mi aon ;
	20	Tan suy intratz en vostr'amor prion,
		Qu'ieu non conosc per on m'en puesca essir.
IV		Pero, dona, si·us vis cor ni talan
		Que·m denhessetz l'amor qu'ie·us ai grazir,
		So es us mals don no volgra guerir ;
	25	Mas, pus no·us plai, al ver Dieu vos coman ;
		De vos mi tuelh, e non ab cor volon,
		Quar res ses vos no·m pot far jauzion :
		Vejatz si·m puesc ab gaug de vos partir !
V		Quar conoissetz que no·us am ab engan,
	30	E quar vos suy plus fis qu'ieu no·us aus dir
		E quar ab vos m'ave viur'o murir,
		Vos afranquis merces vas me d'aitan,
		Dona, que·l cor que·m falh e·m fug e'm fon
		Me sostenguatz, quar ieu no sai vas on
	35	Mi serc secors, se vos mi faitz falhir.
VI		Senher Bernart, no·ns part ren viu del mon,
		Mas la belha que·m destrenh e·m cofon
		Tem que·m fassa per mort de vos partir.