Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,011 Autor: Berenguier de Palazol Gènere: Canso Número: VIII

 

Tant m'abelis joyas et amors e chans

I	1	Tant m'abelis joyas et amors e chans,
		Et alegrier, deport e cortezia,
		Que·l mon non a ricor ni manentia
		Don mielhs d'aisso·m tengues per benanans ;
	5	Doncs, sai hieu ben que mi dons ten las claus
		De totz los bes qu'ieu aten ni esper,
		E ren d'aiso sens lieys non puesc aver.
II		Sa grans valors e sos humils semblans,
		Son gen parlar e sa belha paria,
	10	M'an fait ancse voler sa senhoria
		Plus que d'autra qu'ieu vis pueis ni dabans ;
		E si·l sieu cors [amoros] e suaus,
		En sa merce no·m denha retener,
		Ja d'als Amors no·m pot far mon plazer.
III	15	Tant ai volgut sos bes e sos enans,
		E dezirat lieys e sa companhia
		Que ja no cre, si lonhar m'en volia,
		Que ja partir s'en pogues mos talans ;
		Et s'ieu n'ai dic honor ni be ni laus,
	20	No m'en fas ges per messongier tener,
		Qu'ab sa valor sap ben proar mon ver.
IV		Belha dompna, corteza, benestans,
		Ab segur sen, ses blasm'e ses folhia,
		Si tot no·us vey tan soven cum volria,
	25	Mos pessamens aleuja mos afans,
		En que·m delieyt e·m sojorn e·m repaus ;
		E quan no·us puesc estiers dels huelhs vezer,
		Vey vos ades en pessan jorn e ser.
V		Sabetz per que no·m vir ni no·m balans
	30	De vos amar, ma belha douss'amia ?
		Quar ja no·m cal doptar, si hie·us avia,
		Que mesclessetz falsia ni enjans ;
		Per qu'ieu am mais, quar sol albirar n'aus
		Que vos puscatz a mos ops eschazer
	35	Qu'autra baizar, embrassar ni tener.
VI		Doncs, s' ieu ja·m vey dins vostres bratz enclaus
		Si qu'ambeduy nos semblem d'un voler,
		Meravil me on poiria·l joy caber.