Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,012 Autor: Berenguier de Palazol Gènere: Canso Número: IV

 

Totz temoros e doptans

I	1	Totz temoros e doptans,
		Quais qui·s laiss'a non chaler.
		Sol puesc’ entre·ls bos caber,
		Vuelh que si'auzitz mos chans ;
	5	Pero no·m n'entremetria
		Si mon voler en seguia :
		Mas francamen m'en somo
		Tals cuy non aus dir de no.
II		Dompna, cuy suy fis amans.
	10	Vos me faitz viur'e valer ;
		E quan pensan m'alezer
		E·ls guais amoros semblans
		Que m'an mes de joy en via.
		Dic vos que no·m camjaria
	15	A la belha sospeisso
		Per nulh autr'oc vostre no.
III		Tant etz belha e benestans
		Era mi vengr'a plazer
		Qu'en pogues un oc aver ;
	20	Qu'ades, sitot m'es afans,
		N'am mais la belha fadia
		Qu'el don d'autra no faria :
		De vos aurai aquelh do
		Que plus vuelh que d'autra no ?
IV	25	Francha res, conhda e prezans,
		Veu mi al vostre plazer ;
		E si·us plai mi retener,
		Suy vostres, senes enjans,
		E vostres, si no·us plazia ;
	30	Et en vostra senhoria
		Remanh e serai e so,
		Ab que·m retenguatz o no.
V		Pueys qu'anc no·us vi ni davans,
		No pogui dels huelhs vezer
	35	Re que·m pogues tan plazer,
		Sia mos pros o mos dans,
		Pus qu'ieu vos vi, belh'amia ;
		E quar m'en lays per feunia,
		O per un pauc d'uchaizo,
	40	Guerrey mi eys e vos no.
VI		Dompna, no sai si·us plairia
		Qu'ie·us vis, o si·us pezaria,
		En tan gran doptansa so
		No say s'i·us vis o si no.