Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Codi: 047,007 Autor: Berenguier de Palazol Gènere: Canso Número: V

 

Dona, si totz temps vivia

I	1	Dona, si totz temps vivia,
		Totz temps vos serai aclis :
		Estranhamen m'abelhis
		Qu'ie·us am, qual que dans me·n sia,
	5	Destinatz ni a venir ;
		Si tot no m'en puesc jauzir
		Tan be cum mos cors volria,
		Si·n val mais mos pessamens
		E me·n sap melhor jovens
	10	E deportz o guallardia.
II		Per Dieu, belha douss'amia,
		Per cuy aflam e languis,
		Enaisi m'avetz conquis
		Qu'altra jauzir nom plairia ;
	15	Si tot m'assagiey mentir
		Per tal que pogues cobrir
		La sobramor qu'ie·us avia,
		Anc jorn no·s camget mos sens
		De vos amar finamens,
	20	Ni poderos no·n seria.
III		Molt vuelh vostra senhoria
		Mais que d'altra que anc vis,
		E·l vostre cors francx e fis,
		Genser qu'ieu dir no sabria,
	25	Fa mi d'enveya murir
		Quar plus soven no·us remir ;
		Tan es de bella paria
		Qu'autre joy es dreg niens,
		D'aitan suy ieu ben sabens,
	30	Encontra qui vos avia.
IV		Anc no cuydiey en tal via
		Intrar don ja non issis ;
		Pero tan cochos m'i mis
		Qu'anc non guardiey on iria.
	35	E doncx, dona cuy dezir,
		Pus a cap no puesc yssir
		De so que ieu tan volria
		Quals er mos captenemens ?
		Que sai on prumeiramens
	40	Intrey me truep tota via.
V		Ja'l sens ni la cortezia
		Ni·l bel semblan [ni·l dous ris
		Qui] m'estant [al cor assis
		. . . . . . . . . . . . . . . . . . . . .
	45	No·m de]gron tant [abelir,
		Si no·m denhatz] cossentir,
		[Ans que'l deziriers m'au]cia
		Que·m [sobrapoder'e·m vens] ;
		Que·l vostre [ricx cors valens
	50	Res]taur' ab sen [ma folia].
VI		Foldatz es [e leujaria
		Quar] part vostr[es mandamens
		Vos] am, pero per [nuls sens
		Ma fou]dat non camjaria.