Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 074,016 Autor: Bertolome Zorzi Gènere: Planh Número: LXVIII

 

Si·l monz fondes a maravilla gran

I	1	Si·l monz fondes a maravilla gran,
		Non l’auria ges a descovinenza;
		S'escurzis tot sivals so que resplan
		Puois Quonratz reis, per cui reingnet vaillenza
	5	E valc iovenz
		E rics pretz e totz bes,
		E d'Austorica l'auz ducs Federics,
		Qui d'onrat pretz e de valor fon rics,
		Tan malamenz
	10	Son mort!
		Hai, quals danz n'es!
		Mas car pres al segle tan de dampnage
		Taing qu'om l'azir,
		E car ergoillz ha pres
	15	Forz'e consir
		D'aunir pretz e parage.
II		Mas ieu me vauc trop fort meravillan
		Com hai esfortz qu'en diga·ill meschaenza
		Ni·l cozen dol ni·l sobremortal dan,
	20	Quar dregz fora, segon ma conoissenza,
		Que·l membramenz
		Ses retrar m'aucies
		E tot home qu'es de valor abrics,
		Qar anc non fon hom ioves ni antics,
	25	Que·l mein vaillenz
		Trop fort
		No·ill sobrandes.
		Qu'il e lur faig eron tan d'agradage,
		Que per l'auzir,
	30	Ben qu'om no·ls conogues,
		L'irat sentir
		Fazion alegrage.
III		Que·l reis, en cui non eron anc vint an
		Amava Deu, dreg, mezur'e sïenza,
	35	De que lh'anet pauc Salemos enan,
		E Lamorat valc per armas, sens tenza,
		E lariamenz
		A poder det e mes
		Tan que·l plus larcs senblav'ab lui mendics,
	40	E fon amics als pros et enemics
		Als desplazenz
		Ses tort
		Qu'anc lur fezes,
		Ni non ac meill Anzalos l'eritage
	45	D'aut abellir,
		Tan fon belz e cortes,
		E ses faillir
		Fon del plus aut lignage.
IV		Et el pro duc eron tant aib prezan
	50	Qu'el ac de mout la reial chaptenenza,
		Qu'adreg foron sei dig e sei senblan
		E l’afars ac daus totas partz plazenza,
		Si qu'anc formenz
		Non faillic ni mespres,
	55	Don cuig qu'a Deu fon lurs mortz granz fastics;
		Mas car sofric q'avengues tals destrics,
		Tot fermamenz
		M'acort
		Que·il remembres
	60	Qu'el mon per els non avi'aut estage,
		E que grazir
		Deuri'om per un tres
		L'entier iauzir
		Per lur bel compaingnage.
V	65	Hai! com vivon Tyes et Aleman
		S'inz el cor an d'aquest dan sovinenza?
		Quar tot lur mieill en estz dos perdut an
		E gazaingnat an gran desconoissenza.
		Que si plazenz
	70	No·s venion demanes
		Aunit viuran, tan fon Karles enics,
		Qu'el s'agradet que visques Don Henrics
		E mortz cozenz
		A port
	75	D'ant'alberges
		Estz bars, quar sap Espaingnols d'aut corage,
		E per far dir
		Qu'el non si dupta ges
		En far aunir
	80	Tant honrat seingnorage.
VI		Hei, franca genz,
		Lur mort
		Pensatz ades
		E que·s dira se·us sofretz tal outrage.
	85	Es ar albir
		N'Anfos, qu'onratz reis es,
		Si laiss'aunir
		Son frair'en tal estage!
VII		Als avinenz
	90	Recort
		Que·l plainz faigz es
		Ab gai sonet coindet e d'agradage;
		Qu'estiers m'albir
		Qu'om chantar no·l pogues,
	95	Ni neis auzir
		Tan mou de gran dampnage.