Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 296,001a Autor: Marques Gènere: Tenson fictive Número: LXXI

 

Dona, a vos me coman

I	1	— Dona, [a] vos me coman,
		C’anc res mai non amei tan.
		— Amics, be vos dic e·us man
		Qu'ieu farai vostre coman.
	5	— Dona, trop mi vai tarzan.
		— Amicx, ia no·y auretz dan.
II		— Dona, a la mia fe,
		Murray, s'aysi·m gayre te.
		— Amicx, menbre vos de me,
	10	Qu'ie·us am de cor e de fe.
		— Dona, aiatz en doncx merce.
		— Amicx, si auray yeu be.
III		— Be suy gays et amoros,
		Dona, per amor de vos.
	15	— Amicx, lo meu[s] cors ioyos
		Es vostres tota[s] sazos.
		— Dona, autreyatz lo·m vos!
		— O[c] yeu, amicx bels e bos.
IV		— Dona, per vos mi cofort
	20	E·n fas chanson e deport.
		— Amicx, ies non avetz tort,
		Que ben sabetz qu'ie·us am fort.
		— Dona, co er del conort?
		— Amicx, bona fe vos port.
V	25	— Be soi gueritz ab aitan,
		Dona, de pen'e d'afan,
		— Amicx, sufren merceyan
		Conqueron li fin aman.
		— Dona, trop mi greva·l dan.
	30	Amicx, ye·us retenc bayzan.
VI		— Dona, doncs a vos mi ren
		De mas ionchas humilmen.
		— Marques, en trop d'onramen
		Cuiatz puiar veramen.
	35	— Dona, qu'ie·us am finamen.
		— Marques, e tu fas no-cen.
VII		— Domna, mot ay gran talan
		Qu'ie·us tengues a mon coman.
		Marques, be·m n'iray gardan,
	40	E dizetz folia gran.
		— Dona, ia no·y agras dan.
		— Marques, no me·n plieu en tan!