Chambers, Frank M.. Three Troubadour Poems with Historical Overtones. "Speculum", 54/1 (1979), pp. 42-54.

Codi: 055,001 Autor: Bernart Arnaut de Moncuc Gènere: Sirventes Número: II

 

Er can li rozier

I	1	Er can li rozier
		So ses flor ni grana
		E·l ric menuzier
		An cassa per sana,
	5	M’es pres cossirier
		(Tan me platz lor tensa)
		De far sirventes;
		Car en viltenensa
		An tot bon pretz mes.
	10	E car may
		Me ten gay
		Amors que no fay
		El bel temps de may,
		Eras soy gay, cuy que pes,
	15	Tals joy m’es promes.
II		Man caval corssier
		Veirem vas Tarzana
		Devas Balaguier
		Del pros rey que·s vana
	20	C’a pretz a sobrier.
		Venra ses falhensa
		Lay en Carcasses,
		Mas ges gran temensa
		No·n an li Franses.
	25	Mas ieu n’ai
		De vos sai,
		Dona, que m’esglai
		Lo dezir qu’ieu n’ay
		Del vostre bel cors cortes
	30	Complit de totz bes.
III		E l’armat destrier,
		Ausberc, lansa plana
		E bon bran d’assier
		E guerra propdana
	35	Pretz may que lebrier
		Ni brava parvensa
		Ni patz, en c’om es
		Mermatz de tenensa,
		Baissatz e sotzmes.
	40	E car sai
		Pretz verai
		En vos, cuy aurai,
		Dona, o·n morrai,
		Pretz may car m’es en defes
	45	Que s’autra m’agues.
IV		Be·m plazo l’arquier
		Pres la barbacana,
		Cant trazo·l peirier
		E·l mur dezanvana,
	50	E per mant verdier
		Creis la ost e gensa.
		E volgra·l plagues
		Aital captenensa
		Lay al rey engles
	55	Com mi play
		Can retrai
		Com avetz ab jay,
		Dona, joven sai
		E de beutat pretz conques,
	60	Que no·us en falh res.
V		Et agra entier
		Pretz, cuy quecx soana,
		S’ab aital mestier
		Crides say “Guiana!”
	65	E fer’al premier
		L’onratz Coms valensa;
		Car sos sagels es
		De tan breu legensa
		Qu’ieu non o dic ges.
	70	Mas dirai
		Que ab glay
		.... amors ay.
		Dona, que farai
		Si ab vos no·m val merces
	75	O ma bona fes?
VI		Senhor gay
		E veray,
		Que·s sap de tot play
		Onrar, qu’ieu o say,
	80	De Tolza e d’Aganes,
		Malgrat dels Franses.