Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Codi: 370,005 Autor: Perdigon Gènere: Canso Número: V

 

                                                                                                                                                                                                                              Entr'amor e pessamen

I	1	Entr'amor e pessamen
		e bon cug e greu consir
		e fin joi e lonc desir
		mi menet levan cazen,
	5	e per luec sospir e plor
		de paor,
		que·l comjatz
		que·m fo donatz,
		gent autrejatz
	10	S'oblit, car no soi tornatz.
II		Lo bos cugs en qu'ieu enten
		m'adui molt coral sospir,
		tan tem el cujar faillir
		qu'ai d'un ric enprendemen :
	15	e s'ieu trop estau aillor,
		lei qu'aor
		prec, si·ll platz,
		que no·s deslatz
		lo plaitz fermatz
	20	que·m fo per lieis autreiatz.
III		Ar parra d'afortimen
		qui·m ve laissar e guerpir
		lei, qu'usquex volgr' obezir,
		ni·m rete per chausimen ;
	25	car li valen valedor
		an sabor
		qu'an laissatz
		deseretatz,
		don par pecatz,
	30	fasson captenhs acabatz.
IV		Qui·m laissa ses faillimen,
		no·m cug per aitan deslir,
		qu'enquer sai on puesc guerir.
		Si Dieus e·l Bautz mi cossen ;
	35	que lai truep fina valor
		ses error,
		on l'onratz
		pretz esmeratz
		sobremontatz
	40	ampara·ls desamparatz.
V		Fins Jois, dreitura·us defen
		que, qui que vejatz faillir,
		que vos no·i prendatz albir ;
		mas pretz e valor e sen
	45	vos det Dieus, que·us fetz meillor
		e gensor
		del regnatz :
		per so gardatz
		que l'enganatz
	50	viu sals, e l'autr' encolpatz.
VI		Dal rei d'Aragon m'es gen,
		quar tan li platz enantir
		tot quan bos pretz deu grazir ;
		e·l rei n'Anfos eissamen,
	55	qu'ab rics faitz d'emperador
		creis s'onor ;
		don sapchatz
		que acordatz
		los volgr' en patz
	60	vezer contrais renegatz.
VII		Fillol, si faitz vostra tor
		az onor,
		ben gardatz,
		si ben l'obratz,
	65	que compliscatz
		l'obr'e no la desfasatz.
VIII		Ves n'Arias mon senhor
		vai e cor,
		chans mesclatz ;
	70	e di·ll, si·ll platz,
		qu'entrels regnatz
		par sos fis pretz esmeratz.