Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Codi: 167,037 Autor: Guillem de Cabestaing Gènere: Canso Número: III

 

Mon cor e me e mas bonas chanchos

I	1	Mon cor e me e mas bonas chanchos
		e tot cant sai dauinen dir ne far
		conosc queu taing bona dona de uos
		a cui non aus descobrir ne mostrar
	5	lamor queus ai don languisc e sospire
		e pois lamors nous aus mostrar ne dir
		nel be queus uoill greu mer ad enardir
		seu uolgues mal de mon coratge dire.
II		Al prim queus ui magrops dona que fos
	10	per camors tant no me feçes amar
		que no fossez tan bella ni tan pros
		ni saubessez tan auinen parlar
		caissi pasmei cant uei dels oills rire
		cuna dolsors damor me uenc ferir
	15	el cor quem fe si tremblar e fremir
		ca pauc denan non mori de desire.
III		Adoncs parti destreitz et enueios
		de uos donna cui desir e teng car
		si qez anc pois seingner ne poderos
	20	non fai de me mas de mon cor celar
		per so conosc camors me uol ausire
		e pois mi plaz molt bei mes a soffrire
		car autramen non poirieu morir
		tan bonamen ni a tan dolz martire.
IV	25	Asso ma trait mos fis cors amoros
		canc mais non fo leu ad enamorar
		e qant eu uei donna loc ni saissos
		per nuilla re nous aus dir mon pensar
		ni uos non plaz connoisser mon martire
	30	pro saber podez leu lo dessir
		qeu ai de uos ab mant cortes suspir
		qem uedez far can uos uei ni uos remire.
V		Tot qant macort en un mes o en dos
		de cal guissaus uos poges genceis preiar
	35	ublit quant uei uostras bellas faissos
		que no men pos souenir ni membrar
		tan qant uos uei sui del uezer iauzire
		e qant men part remaing en tal conssire
		que ges la noiz non pos en leit dormir
	40	no sai al far mas plaing e uoll e uire.
VI		Dona lafanz el cossirs mes tan bos
		qan plus ne pens e mais i uoill pensar
		et ai ab me maintas uez compaignos
		qez eu uolgra mais tot soleill estar
	45	que tan bon mes qant me pens ni malbire
		uostra ualor mas a qui eis mazir
		e mor car ai que nous aus descobrir
		so don loncs temps cre que serai sofrire.