De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 156,002 Autor: Folquet de Romans Gènere: Canso-Sirventes Número: LXXXVI

 

Aucel no truob chantan

I	1	Aucel no truob chantan
		Ni no vei flor novella,
		Mas ieu nom lais de chan
		Ni de joi quim n’apella;
	5	Qu’en joi ai tot mon cor,
		Qu’om no sai quoras mor;
		E ma donnam te let,
		Qu’ab joi plagen
		Mon fi cor gazanhet;
	10	Per qu’ieu lim ren;
		Qu’ainch puois no fui ses joi noit ne dia.
II		De joi deu far semblan
		Qui fin’amors capdella:
		Per qu’ieu fach son coman;
	15	Quar tan gen me cembella
		Qu’en tal ai mes mon cor
		C’onors m’er si lai mor;
		Que s’amors me nafret
		Tan douchamen
	20	Qu’inz en mon cor m’intret
		Jogan, rizen;
		Totz soi sieus; qu’aissi fos ella mia!
III		Tan l’am de bon talan
		Quel cor me ressancella,
	25	Quez ainch no amet tan
		Tristanz Ysolt la bella;
		Qu’ieu sai de mon fin cor
		Que per sobramar mor;
		Qu’ainc mais hom no amet
	30	Tan coralmen
		Ni melhz no atendet
		Son joi, sofren;
		Qu’aissi conquer amics bon’amia.
IV		Qui m’en vol tener dan
	35	Aj’en son olh postella!
		Qu’ieu ai temencha gran
		Quan nigus li favella.
		Donna, ajaz chal cor
		Que mieus es lai que mor,
	40	Qu’ainch un jor nom lonhet
		Vostre cors gen
		Ni se no desiret
		Tan coralmen;
		Las, ar crei quel desiriers m’aucia!
V	45	A l’Emperador man,
		Pos valors renovella,
		Que mov’ab esfortz gran
		Contra la gen fradella;
		Ez aj’en Dieu son cor,
	50	Que Sarrazi e Mor
		An tengut li destret
		Trop lonjamen,
		La terr’on Dieus nasquet
		El Monumen;
	55	E tanh ben que per lui cobrat sia.
VI		Rics om qu’es d’avol cor
		Fai be lo jor que mor:
		E son n’alegr’e let
		Fil e paren,
	60	Qu’aicho qu’el amasset
		Parton rien;
		Gardatz si fai foldatz qui s’i fia!
VII		N’Oth del Caret, lo cor
		Avez on prez no mor;
	65	Qu’ainc nulhz bars no renhet
		Plus franchamen
		Ni genchers no obret
		Home valen;
		Per qu’ieu am la vostra senhoria.