De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 074,010 Autor: Bertolome Zorzi Gènere: Sirventes (de réponse) Número: CLXVI

 

Mout fort me sui d’un chant meravilhatz 

I	1	Mout fort me sui d’un chant meravilhatz
		Per lui qu’o fetz, si tot es dregz quem plaja,
		Quar cel que es valenz ni ensenhatz
		Deu ben pensar e gardar que retraja;
	5	Quar nienz es qu’om razonar pogues
		Lo tort per dreg, quels pros nos conogues,
		E pod a leu perdre, mon escien,
		Son pretz aicel qui tort a dreg defen.
II		Doncs, si ben fos premiers aconselhatz,
	10	Pois d’escondir Genoes tant s’asaja,
		Non crei qu’el chant agues mainz motz pausatz
		Qui membrar fan lor sobremortal plaja;
		Qu’el autreja c’abatutz e mespres
		Totz lor afars pels Venecians es,
	15	E l’uchaizos, qu’en pauz’ en lur conten,
		Non pot donar contral mal guarimen.
III		Car hom non deu de ren esser blasmatz
		Si’l fai cois tanh ni ’s dregz que mal l’en chaja;
		Doncs, pois tan gen guerrejan ses guidatz,
	20	Nom par qu’en re lur descortz nogut n’aja;
		C’anc al jostar no fo nulh temps que res
		Mas arditz cors falhiment lur fezes,
		Car il foron totas vez mais de gen,
		Gent acesmat e per un dos, soven.
IV	25	E l’aug retrair qu’il tengron afrenatz
		Venicians, ja qu’era lur meschaja;
		Mas, cum ancse fon lur poders doptatz
		Pels Genoes, nos membre nolh desplaja,
		Cum de lor naus menav’us sols tres pres;
	30	Mas escondir pogra melhs per un tres;
		C’anc non preiron Venecian conten
		Non aguesson lauzor al fenimen.
V		Mas, s’el volgues semblar enrazonatz,
		Non degra pas dir razon tant savaja
	35	Ni que trei flac valgron trenta prezatz;
		Pero dels tres nom par respos s’eschaja;
		Don ieu m’en pas e dic so qu’es pales,
		Que, quant es melhs als Venecians pres,
		Adoncs renhon plus cortes d’avinen
	40	E no s’en van en ren desconoissen.
VI		Oimais mi par que ben si’ aquitatz
		D’aisso qu’a dig, e, s’el no s’en apaja,
		De Venecians queirals lor faitz honratz
		Els grans conquistz faitz ab valor veraja,
	45	E cum er an vencutz los Genoes
		Et en anta l’Emperador grec mes;
		E jutgara pois s’il valon nien,
		Qu’eu non ai plus de respondre talen.
VII		Valens domna, qu’en cel pais renhatz
	50	Per cui plaidei, pros e plazens e gaja,
		Merce vos clam qu’a mi valer dejatz
		Que tot quant aug ni vei lo cor m’esmaja;
		E sui tan fort de vostr’amor enpres
		Que, si no vei vostre gai cors cortes,
	55	Viure non puosc, so sapchatz veramen,
		C’, ab lo respeit que eu n’ai, muer viven.
VIII		Venecian, qui ditz quelh Genoes
		Vos an faig dan nius an en dolor mes,
		Vostr’onrat pretz non sap nil dan cozen
		Que lur avez fait d’aver ni de gen.
IX	60	Bonifaci Calvo, mon sirventes
		Vos man, eus prec quel dirs nous enuei ges;
		Quar del taisser grat corteziam ren,
		E majormenz dels Genoes l’enten.