Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Codi: 248,068 Autor: Guiraut Riquier Gènere: Vers Número: III

 

Qui·m disses, non a dos ans

I	1	Qui·m disses, non a dos ans
		Que·l laus me fos desgrazitz
		Del rey n'Anfos de pretz guitz,
		Mot me fora greus afans ;
	5	Qu'er es tant vil tengutz sai
		E blasmatz, que sol parlar
		Non aus de luy ad honor,
		Don ai al cor tal dolor
		Qu'ab pauc chant non desempar.
II	10	A montz homes l'aug blasmar
		Qui li foran valedor,
		Si guerra l'agues sabor,
		Tant quon a cor de donar.
		Mas ieu las ! suy en esmai,
	15	Qu'om me sol lauzar mos chans
		Per elh que m'er abelhitz,
		Tant qu'ieu serai sebelhitz,
		Ans que dreg alhors los lans.
III		Mala veira sos efans,
	20	Si·l pus de la gent ver ditz,
		Que vius n'er despoestaditz.
		E Dieus don-me mort enans ;
		Quar ja gran joy non aurai,
		Tro per ver auja comtar.
	25	Que·l sieu enemic major
		Aian ab luy tal amor
		Que d'elhs no·l calha gardar.
IV		Ab dreg a volgut renhar
		Et ab pretz et ab valor,
	30	Creyssen de terra ab lauzor
		Le reys n'Anfos que Dieus gar.
		Et aras deu mielhs e may
		Voler dreg e patz dos tans,
		Sol que non si'escarnitz ;
	35	Per que de Dieus si'aizitz,
		Et sos pretz no·s desenans.
V		Mos ditz sera pro bastans,
		Sol que per luy si'auzitz ;
		Qu'ieu parli totz esferzitz,
	40	E si m'enten, non l'er dans.
		Pero aitant li diray,
		Que reys deu amics amar ;
		Mas de l'als dir ai temor,
		Elh chauzisca son melhor
	45	Per son dreg dever a far.
VI		Jamays no m'esforsaray
		Del rey castellan lauzar
		Ni d'autre, si en error
		Ven sos pretz, qu'a deshonor
	50	Me pogues ab dan tornar.
VII		No suy astrucs de senhor
		Que·m vuelha de cor amar.