Nelli, René; Alibert, Louis; Sire, P. M.. Actualité des Troubadours (Les Troubadours de l'Aude). "Pyrénées. Cahiers de la pensée française", 2 (1941), pp. 118-210.

Codi: 248,089 Autor: Guiraut Riquier Gènere: Vers Número: IV

 

Yverns no·m te de chantar embargat

I	1	Yverns no·m te de chantar embargat
		Ni per estiu non suy pus volontos,
		Mas totas vetz, quan m'en somo razos,
		Truep mon engenh de chantar atemprat ;
	5	Et es be semblans
		Que no m'es afans
		Chans,
		Qu'aitals sabers m'es donatz,
		Qu'ieu chan quan vuelh, de que·m platz.
II	10	Ses plazer chant e ses esper de grat,
		Pero mos chans non er tristz ni joyos,
		Qu'ieu no·m lauzi ni no suy rancuros
		Del Belh Deport qu'ay non amatz amat.
		Don sembli efans
	15	Quar ay sufert tans
		Ans
		Que sol no·m suy assaiatz
		A virar de l'autre latz.
III		Del segle veg que m'a lag galiat
	20	Quar sos segres m'es avutz saboros,
		Crezen que sens mi fos ab saber bos,
		Mas eras n'ai mon cor desesperat ;
		Qu'ab vils faitz truans
		N'es hom benanans,
	25	Ans
		Que vergonhos ni senatz,
		E vuelh n'esser enjanatz.
IV		S'ieu ai servit, no m'es gazardonat
		Per mos senhors ni pel segle ginhos,
	30	Ni per dona, de que no suy clamos ;
		Quar s'amors m'a en tal sabor montat,
		Que m'es pro bastans,
		Mas no m'es enans
		grans,
	35	Et el temps que n'es passatz
		Foram grazitz et honratz.
V		E si no m'es esta vetz restaurat
		Per lo valen rey castellan n'Anfos,
		Si que semble ben sieus lo gazardos,
	40	De mon chantar e d'elh penrai comjat ;
		Pero non clamans,
		Quar trop malestans
		Dans
		Seria tant es lauzatz
	45	Avutz per mi de vertatz.
VI		No suy acordans
		Bos reys, qu'ieu mos chans
		Lans
		Vas lunh autre rey : pagatz
	50	Ni fuy quinz' ans a passat.
VII		Doncx pus que·us me suy donatz,
		Parer dey vostres, si·us platz.