Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Codi: 392,016a Autor: Raimbaut de Vaqueiras Gènere: Alba Número: XXV

 

Alba

I	1	Gaita be,     gaiteta del chastel,
		quan la re     que plus m’es bon e bel
		ai a me      trosqu’ a l’alba.
		E·l jornz ve     e non l’apel;
	5	joc novel
		mi tol l’alba,
		l’alba, oi l’alba!
II		Gait’, amics,     e veilh’ e crid’ e bray,
		qu’eu sui ricx     e so qu’eu plus voilh ai.
	10	Mais enics     sui de l’alba,
		e·l destrics     que·l jorn nos fai
		mi desplai
		plus que l’alba,
		l’alba, oi l’alba!
III	15	Gaitaz vos,     gaiteta de la tor,
		del gelos,     vostre malvays seynor,
		enujos     plus que l’alba,
		que za jos     parlam d’amor.
		Mas paor
	20	nos fai l’alba,
		l’alba, oi l’alba!
IV		Domn’, adeu!     que non puis mais estar;
		malgrat meu     me·n coven ad annar.
		Mais tan greu     m’es de l’alba,
	25	que tan leu     la vei levar;
		enganar
		nos vol l’alba,
		l’alba, oi l’alba!