Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Davantal
* Aparat crític
* Traduccions

 

Anglade, Joseph. Les poésies de Peire Vidal. Paris: Librairie ancienne Honoré Champion, 1913

Codi: 364,050 Autor: Peire Vidal Gènere: Canso Número: XII

 

Una chanso ai faita mortalmen

I 1 Una chanso ai faita mortalmen
    Si qu'eu no sai dire com ni consi,
    Qu'anc noit ni jorn, de ser ni de mati,
    Non tenc mon cor ni nulh mon pensamen ;
  5 Mas com era, l'autrier, mout en balansa,
    Pres me d'amor aitan grans benanansa,
    Que comensei a chanso far desse
    De ma domna de cui tan mi sove.
     
II   Doncs per que·m te mi dons en tal turmen ?
  10 Qu'anc nulha res mais tan no m'abeli,
    Ni anc mon cor des l'ora que la vi
    Non poc partir ni m'amor ni mon sen.
    E si·m fai mal, ilh fai mout gran erransa
    Mas si·m fezes amistat e pitansa,
  15 No pogra far el mon major merce,
    Pois a·n razo, car s'amors me soste.
     
III   Mas ges no·m par qu'ilh n'aja bon talen,
    E non per tan qu'ab me parla e·m ri,
    E promet me, mais anc mais no menti
  20 Nulha domna tant azaut ni tan gen.
    Pero·l bels ditz me torn' en alegransa,
    Et si·m disses vertat, ab tota Fransa
    Non estera tan suau ni tan be ;
    Mas non a cor ni voluntat en re.
     
IV 25 Anc non amet nulhs hom tan folamen
    Neis l'escudiers qu'a la taula mori.
    Atressi·m mor, mas plus d'a pas m'auci
    Leis que o sap far tan cortezamen.
    Car ges no·m fier de coutel ni de lansa,
  30 Mas ab bels ditz et ab plazen semblansa :
    Veus las armas ab que·m combat ancse,
    Depos la vi et enquer si m'o te,
     
V   Pos sa beutat que·l det enteiramen
    Nostre Senher, qu'anc re no li·n parti,
  35 E gaug entier e sen verai e fi :
    Tot so m'ave, car s'amor no·m consen.
    Pero de mar tra hom senes duptansa
    Aigua doussa, per qu'eu ai esperansa,
    Que sens e genhs e car no m'en recre.
  40 M'en traira jois, qu'en als no m'en refre.
     
VI   Sivals, domna, si·us membres del manen
    Que laisset Lazer morir denan si,
    Quals fo·l meritz que apres lo·n segui,
    Pois de ben leu preiratz esgardame
  45 Co·m traissessetz de ma greu malanansa,
    Qu'estiers no posc ges aver benanansa,
    S'ab tot lo mon ses vos avia be.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI