Anglade, Joseph. Les poésies de Peire Vidal. Paris: Librairie ancienne Honoré Champion, 1913

Codi: 364,034 Autor: Peire Vidal Gènere: Canso Número: XXXVI

 

Per ces dei una chanso

I	1	Per ces dei una chanso
		Al cortes rei d'Arago,
		Qu'estiers non chanter' ongan
		Per l'enoi e per l'enjan
	5	Que·m fetz cilh cui Deus abais;
		E s'anc fui per Amor gais,
		Et la gurpisc e la lais,
		E mais no for' amoros,
		Durs cors, si per vos no fos.
II	10	E ja Deus noca·m perdo,
		S'anc tan bela domna fo
		Ni d'aitan cortes semblan,
		Ni anc hom tan gen parlan
		No vi ni o fara mais :
	15	Que quant us motz l'eis del cais
		Et eu l'aug, sui tan licais,
		Qu'en cre morir talentos,
		S'al meins no l'en aug dir dos.
III		E quar en aital sazo
	20	Me fetz socors bel e bo,
		Vos en ren merce chantan :
		Qu'estiers non pogra l'afan
		Sofrir ni·l plor ni·l pantais,
		Quant ela s'amor m'estrais,
	25	Si no fos us cortes jais
		Que·m ve, domna, de ves vos,
		Per qu'eu m'en viu deleitos.
IV		E per aquesta razo
		Conosc be que vostr'om so,
	30	E volh estar derenan
		Del tot a vostre coman.
		E metrai me tot en fais
		De dir e de far que·us plais,
		Com vostre rics pretz verais
	35	An s'enan totas sazos
		Entre·ls drutz galhartz e bos.