Anglade, Joseph. Poésies du troubadour Peire Raimon de Toulose . Toulouse: E. Privat, 1920

(CdT en procés d'incorporació)

Codi: 355,003 Autor: Peire Raimon de Tolosa Gènere: Canso Número: [II]

 

 Ar ai ben d'amor apres

I	1	Ar ai ben d'amor apres
		Cum sap de son dart ferir;
		Mas cum pueys sap gent guerir,
		Enqueras no sai ieu ges.
	5	Lo metge sai ben qui es,
		Que·m pot sols salut donar,
		Mas que·m val, s'ieu demostrar
		Ja non l'aus ma mortal playa?
II		Morrai per mon nescies,
	10	Quar no·l vau mostrar e dir
		La dolor que·m fai sofrir,
		Dom no·m pot cosselhar res
		Mas quan sos gais cors cortes,
		Qu'ieu tan desir e tenc car
	15	Que non l'aus merce clamar,
		Tal paor ai que·l desplaya.
III		Gran talan ai cum pogues
		De ginols yes lieys venir
		De tan luenh cum hom cauzir
	20	La poiria, que vengues
		Mas juntas far homenes,
		Cum sers a senhor deu far,
		Et en ploran merceyar
		Ses paor de gent savaya.
IV	25	Bona dona on totz bes
		Vezem granar e florir,
		Pus tan vos am eu·s dezir,
		Merce vos clam que merces
		Mi valha e ma bona fes,
		Qu'ieu serai de bon celar
	30	E plus fis, si Dieus m'ampar,
		Que no fo Landrix a N'Aya.
V		Ja no·m digua lipaudes
		Nulhs hom per mon cor auzir,
		(Qu'ieu l'en sabrai gent mentir),
	35	Que pus trahit me·n agues,
		En crides pueys mon fades.
		Mas tan suy greus a proar,
		Qu'ans poiratz mi·l bureus far
		De presset dir que fos saya.
VI	40	Mon Diaman, que tenc car,
		Vuelh de ma chanso pregar
		Qu'a Toloza la·m retraya.