Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,008 Autor: Peire Raimon de Tolosa Gènere: Canso Número: [VII]

 

Lo dolz chan qu'au de la calandra

I	1	Lo dolz chan qu'au de la calandra
		Qu'en preisen chant'e la douchor
		Del temps novel e·l fin'odor
		De las flors mi dona talent
	5	De chantar; per qu'eu eissamen
		Voill un novell vers comensar
		Per conortar mi meteis, car Amor
		Mi destreing fort e·m dona grant dolor;
		Mas eu ades chant e·m deport e·m joc.
II	10	E fatz si com la salamandra,
		Quar es de tan fera fredor
		Que viu en foc e la chalor
		Esteing si que no·il notz nient;
		Et eu per bon entendimen
	15	Estreing cho que·m degra bruslar;
		E s'al cujar no·m faill, mais amillior.
		Non ac home el mont tant grant seingnor
		Com eu aurai quant midons veira loc.
III		Pero qui·m dones Alixandra
	20	No volgra camiar leis qu'es flor
		De Jovent et e de Joi sabor
		Per nuill'autra; qu'en mon vivent
		No pogra trobar tan plaznt
		Ni cointa d'amoros parlar;
	25	Per qu'eu amar la voill, quar en valor
		M'a fait entendre e pojar en honor,
		Et encara, si·ll platz, donar mi poc.
IV		Que zo que mais val qu'Alixandra
		E meill de nuill'autra ricor
	30	S'amor que·m tolra duel e plor
		E·m donara joi covenent
		E·m fara estar baut e jauzent;
		Donc me dei eu ben alegrar
		E mais onrar leis cui ai socor...