Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,010 Autor: Peire Raimon de Tolosa Gènere: Canso Número: [IX]

 

Pessamen ai e cossir

I	1	Pessamen ai e cossir
		D'una chanso faire
		Qu'a lieys denhes abelhir
		Cuy sui fis amaire;
	5	E s'ieu pogues avenir
		En bos digz retraire,
		Far pogra saber
		Que ieu plus fin joy esper,
		Que nuls natz de mayre.
II	10	Lo cors e·l sen e l'albir
		Ai mes e·l vejaire
		En lieys honrar e servir,
		Quar es la belhaire
		Qu'om pogues el mon chauzir,
	15	Don no·m puesc estraire
		Ni mon cor mover;
		Qu'Amors me fai tan temer
		Lieys qu'als non am guaire.
III		La fina vera valors
	20	Plus d'autra valensa,
		E·l pretz, e·l fresca colors
		Me platz e m'agensa:
		Que si me valgues Amors
		Tan que m'entendensa
	25	Mi dons abelhis,
		Plus ric joy que Paradis
		Agr'a ma parvensa.
IV		Nulh'autra no·m pot secors
		Far ni dar guirensa;
	30	Et on plus en sen dolors
		Plus n'ai sovinensa;
		Mas ges dire mas clamors
		No l'aus per temensa;
		Tan li sui aclis
	35	Qu'on plus vas me s'afortis,
		Mai l'am ses falhensa.
V		E fora li benestan
		Si·m des alegransa,
		Tan qu'aleuges mon afan
	40	Ab douss'acoindansa:
		Qu'ieu li suy senes enguan,
		E non ai membransa
		D'als, mas quom fezes
		Tot so qu'a mi dons plagues,
	45	Pero pauc m'enansa.
VI		Qu'ades m'en vauc meyluran
		On plus n'ai pezansa
		Vas lieys, e suefri mon dan
		Ab bon'esperansa;
	50	E doblera mon talan
		Sil belha semblansa,
		Gentils cors cortes,
		Si·t prezes de me merces
		O qualsque pitansa.