Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,012 Autor: Peire Raimon de Tolosa Gènere: Canso Número: [X]

 

Pos lo prims verjans brotona

I	1	Pos lo prims verjans brotona
		De que nais lo frug e·l fuelh,
		E·l rossinhols s'abandona
		De chantar per mieg lo bruelh,
	5	Bela m'es la retindida
		Que fai per mieg la giardina.
II		Drutz que pros don'abandona
		Ben laus que·s gart de jangluelh,
		Que lauzengier, bec d'ascona,
	10	(Car son plan en far lur truelh)
		Ab lor mensonja forbida
		Cujon falsar amor fina.
III		Qui de joi porta corona
		Ben es dreg c'om l'en despuelh,
	15	Si ves sa dona tensona
		O totz sos fatz non aculh,
		Que amors es tan chauzida
		C'ab humilitat s'aizina.
IV		Gellosia·m tol e·m dona
	20	So que pus am e mais vuelh;
		A me non cal, qui q'en grona,
		Pueys qye dossamens m'acualh
		Ma domna cui fin Joys guida
		E pretz e Jovens aclina.
V	25	Si ma domna no·m perdona,
		Grieu viurai mais ses corduelh,
		E vueilh q'om viu me repona,
		Qar anc li mostrei ergueilh;
		Mas dretz es qi merce crida
	30	Que trueb de son mal mescina.
VI		Tan com la mars avirona
		N'ay triat, ses dig baduelh,
		La gensor e la pus bona
		C'oncas vezesson miey huelh,
	35	Blanca, fresc'e colorida,
		Et es de bona doctrina.
VII		Lai al renc de Barsalona
		Estay l'amors c'amar suelh;
		E qui d'autr'amor me sona
	40	Perda Dieus que non l'acuelh;
		Qu'ieu non partray a ma vida,
		Tant es de bona razina.
VIII		Le vers s'a hueimais fenida
		Q'En Gintartz d'Anton l'afina.