Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,013 Autor: Peire Raimon de Tolosa Gènere: Canso Número: [XI]

 

Pos vei parer la flor e·l glay

		Pos vei parer la flor e·l glay
		É dels auzels m'agrada·l chans,
		De far chanso m'es pres talans
		Ab motz plazens et ab so guay;
		E pus de ben amar melhur,
		Segon razo,
		Trop en dey mielhs far motz ab so:
		E si per ma domn'es grazitz
		Mos chans, ben er mielhs enantitz.
		Fis e frans ab fin cor veray
		Suy ves lieys qu'es guay'e prezans,
		Bel'e plazens e benestans
		Mil tans plus que dire no say,
		E te son cors ferm e segur
		De falhizo:
		Que de nulh preyador fello
		Per cuy fis domneys es delitz
		Non es per lieys sos pretz auzitz.
		E pus fin'amors la m'atray,
		Per Deu no m'en deu venir dans,
		Qu'ieu li suy tan fizels amans
		Que re al cor tan no m'estay;
		Per que ja lauzengier tafur,
		Cui Dieus mal do!
		No·m degran neguna sazo
		Tener dan, c'usquexs gab'e ditz,
		Que per luy es Joys desconfitz.
		Dona promet e don'estray,
		E mostr'erguelh e bels semblans,
		E ditz per guab e per bobans
		Mayntas res ab certes essay,
		E siey fait son leyal e pur
		Ses aunit do;
		E son mayntas d'aytal faisso
		En cui Pretz entiers es complitz,
		E d'autras en cuy es aunitz.
		Belha domna, ja no serai
		Jauzens ses vos, ni benanans;
		Qu'ieu suy selh que vostres comans
		Tostemps a mon poder faray:
		Aisso vos man per ver e·us jur
		Qu'anc hom no fo
		Plus leyals ves amor qu'ieu so:
		E fuy per vos servir noyritz
		E suy d'autras amors fayditz.
		Ja no·m tenran fossal ni mur
		Que ma chanzon
		Non port al valen et al pro
		Guillem Malaspina q'es guitz
		De Pretz, c'us no·ill lo contraditz.