Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,014 Autor: Peire Raimon de Tolosa Gènere: Canso Número: [XII]

 

Pos vezem bosc e broills floritz

i	1	Pos vezem boscs e broils flortiz
		E·il prat son groc e vert e vermail,
		E·l chant e·l refrim e·l trepeil
		Auzem dels auzellos petitz,
	5	Be·s taing c'un novel chan fabrec
		En aquest bel douz temps d'avril;
		E si be so·ill mot maestril,
		Leu seran d'entendre'a unquec.
II		E quar non trop gair on desplec
	10	Mon ferm natural sen sotil,
		Per tan non clam mon saber vil,
		Sitot enquer grans non parec;
		C'aissi com si trobav'escritz
		Bon motz, tan gen los appareill
	15	Que no·m par que ja trop pareil
		Qu'en chantan formes meillors ditz.
III		Mas uns gens cors, francs e grazitz,
		C'anc tan bels no·s vie en espeill,
		Per cui per e fremisc e veill,
	20	M'es e mon cor tant abellitz
		Que d'alre sevir no m'embrec
		Mas ma domna franqu'et huml;
		Per qu'eu ses tot enjan m'apil
		Ens'amor que·m ten cobes lec.
IV	25	Anc om en ben amar non crec
		Tan con en midonz, don m'apil
		En leis servir, c'ab un pauc fil
		M'a pres e cug qu'e[n] pauc m'eisec;
		Mas ges non tem parliers ni critz,
	30	Tant esper son liai conseill;
		E si·l platz qu'ella m'aconseill,
		Gen serai de fin joi garnitz.
V		Ades es lai mos esperitz
		On il es, don non meraveill;
	35	C'aitan con fer rais de soleill,
		Non es tan de bos aips complitz
		Nul'autra ni par c'ab leis s'esc
		De beutat, s'eran d'autras mil;
		Don prec midonz que no m'avil,
	40	Se mos cors vol mais que non dec.
VI		Per ma domba maigrisc e secn
		Car son gen cors format gentil
		Non vei; e fora mortz de gil
		Tro qu'un pauc mos cors s'esperec.