Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,015 Autor: Peire Raimon de Tolosa Gènere: Canso Número: [XIII]

 

S'ieu fos aventuratz

I	1	S'ieu fos aventuratz
		De domna ni d'amor,
		De tot'altra ricor
		Fora manentz assatz;
	5	Mas lausenguer truan
		Mi tolon joi e chan,
		Per q'eu son tant iratz
		C'ab pauc desesperatz
		Non muer; et es non senz
	10	Qi s'aïra per autrui faillimenz.
II		Mas granz es lo pechatz
		A tot mal parlador
		Qe si met en amor
		Don ja non er laudatz;
	15	Qe mentir ab enjan
		Tol honor et fai dan,
		Don es deseretatz
		Mainz hom pros e cochatz.
		Ai! Deu(s), per que consentz
	20	C'om sofra·ls tortz don non es malmerenz.
III		Vergiers ni flors ni pratz
		No m'an fait chantador,
		Mas per vos cui ador,
		Domna, si m'allegratz;
	25	Q'eu non chantera onguan,
		Mas lo gent cors preisan
		E vostra gran beutatz
		M'abelis tant e·m platz
		Q'a mils vers sagramenz
	30	No·us puesc mostrar com vos sui benvolenz.
IV		Se ma fia'amistatz
		Vos avia sabor
		Tan qe per servidor
		Vostr'on fos reclamatz,
	35	Ben agra meinz d'afan,
		Que ren als no deman.
		E rics dons qant es datz
		Es grazitz et presatz
		Trop mais pel conoisencz
	40	Qe per malvais parliers desavinenz.
V		Domna, ben voil sapchatz
		Qe la fina color
		E·l sen e la valor
		E·l vostre pretz hondratz
	45	Mi fan far desiran
		Maint sospir, per q'eus man
		Qe vostre endomenjatz
		Son com serf qu'es compratz:
		E qui·l sieu meteis venz,
	50	Non par sia ges si bons afortimenz.