Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Codi: 202,012 Autor: Guilhem Ademar Gènere: Canso Número: XII

 

 S'ieu conogues que·m fos enans

 

I	1	S'ieu conogues que·m fos enans
		Vas l' amor midons vers ni sos,
		Mout en fora plus volentos
		De far que non es mos talans.
	5	E pero no m'en vuelh gequir:
		Ans am mais em perdo chantar
		De lieys qu'autr'amor conquistar.
II		D'aquesta suy fizels amans,
		E no·l serai fals ni ginhos;
	10	Quar non estai de cel en jos
		Negun'ab belhazors semblans
		- A cuy Dieus donet lo chauzir
		Del mon per que·1 fai leu trïar:
		Lieys prec e tot l'als lays estar.
III	15	Ben say que ja no er mos dans
		Quar l'am mais d'autra res qu'anc fos;
		Qu'elh'es tant ensenhad'e pros
		Que del tot m' er guazardonans.
		He·l guazardo no puesc falhir,
	20	Quar ab un ris me pot payar,
		S'ieu n'er'estatz pres oltramar.
IV		Q'us paucs de bes m'es de leys grans:
		Quan l'en ai, mout en suy joyos.
		E greus trebalhs e perilhos,
	25	Quan m'en ve, ges no·m sembl'afans.
		Doncx quon o sai? - Quar o aug dir:
		Amicx ai que·m volon jurar
		Que pen'aisso que leu me par.
V		Tant es cortez'e benestans
	30	E riqu'e de belhas faissos,
		Qu'ieu n'ay estat mout cossiros
		Loncs temps e mos cors sospirans;
		Quar ja de lieys no·m pot mentir
		Nuls hom que la vuelha lauzar,
	35	Ni ver dir, si la vol blasmar.
VI		Quoras qu'ieu fos grieus ni pezans
		Ni abruzitz ni nualhos,
		Eras suy bautz e delechos
		E·m vau ves lieys far sos comans.
	40	E s'ilha me vol obezir,
		No·m lays Dieus de lieys tan lonhar
		Que no·m trobe ses trop sercar.
VII		Per lieys m'en perdra[i]·l rey Ferrans
		E las cortz e·ls dos e·ls baros,
	45	Non per aver ni per mancos
		Ni per cavalhs ni per bezans:
		Que res tan cum lieys non dezir.
		E no·m pot nulhs hom estancar,
		Si no·m fai penre o lïar.
VIII	50	E prec midons al vers fenir,
		Cuy suy homs per vendr'e per dar,
		Que pes d'en Guillem Azemar!