Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 237,001 Autor: Guillem Uc d'Albi Gènere: Canso Número: LXIX

 

Quant lo braus fregz yverns despuella

I	1	Quant lo braus fregz yverns despuella
		boscatges, vergiers e iardis,
		e non reverdis flors ni fuella,
		e l'auzellet estan caps clis,
	5	e quant la neus chai sus la landa,
		adoncx sí fin' amors m'abranda
		que·l yverns fregz mi par pascors,
		la neus e·l gels fuelhas e flors.
II		Atressi quo·l laupartz aucire
	10	sap en la forest lo leo,
		m'a mes trop en plus greu martire
		ab belh semblan silh de cuy so;
		quon mais l'am e vuelh sa companha,
		pus m'es salvatga et estranha;
	15	quon plus li suy sers e sosmes,
		adoncx mi fai piegz per un tres;
III		Perque soven ma cara.s muella
		ab l'aigua que nays de mon vis,
		tal paor ay, plazer no·m cuelha
	20	del sieu gen cors clar blanc e lis;
		quar sa valors sai qu'es tan granda
		que dels Portz entro en Yrlanda
		pot, si·l plai, triar els melhors,
		ayssi·l val beutatz e ricors;
IV	25	Per qu'ie·n planh e·n plor e·n sospire,
		quan pessan remir sa faisso,
		quar yeu non l'aus mostrar ni dire
		que·m fezes del sieu tort perdo;
		mas sufrirai tro que·m sofranha
	30	lo cor del cors, o quella·m planha,
		qu'amors la·m vensa o merces
		midons, qu'es senhals de totz bes.
V		Perque·l prec ma dolors li duelha,
		quar tan non dezir paradis
	35	mas qu'ab son gent bratz blanc m'acuella
		prop de la color e·l dous ris
		e si o fay, tan quan guaranda
		solelhs e mars, quasq'us a randa,
		poyrai dir als fis amadors,
	40	mos fis ioys part totz creys e sors;
VI		Quar tuit silh que sabon eslire
		lo pauc e·l dan e·l trop e·l pro,
		entre totz no sabrian escrire
		las plazens beutatz qu'en lieys so
	45	e s'ieu dic re que be no·ys tanha,
		mals colps me parta tot e·m franha,
		quar la genser e·l mielher es
		qu'anc mais ames, per que m'a pres.
VI		Tant es ma dolors sobregranda
	50	per Foys, qu'aissi m'art e m'abranda,
		ses Foys res no·m pot dar secors
		sal de mon Be·lh-sostenh'-amors.
VII		Ma chanso vuelh que no remanha
		tro a sselh que fin pretz guazanha,
	55	lo pros coms de Rodes, on es
		dieus e dreitz, vergonha e merces.