Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 063,008 Autor: Bernart Marti Gènere: Vers Número: XVI

 

Quan l'erba es reverdezida

I	1	Quan l'erba es reverdezida
		els pratz de lonc lo vivier,
		e·l rossinhols bray e crida,
		e son florit li vergier,
	5	adoncx par que·l temps s'esclaire,
		quan hom au las ranas braire
		el mares e per lo riu.
II		Si ai amor encobida
		e mes tot mon cossirier
	10	que ia no vuelh'a ma vida
		mon grat far autre mestier,
		qu'anc pus nasquey de ma maire,
		no volgui autr'obra faire,
		ni d'autre labor no viu.
III	15	Mas ieu n'ay una chauzida
		que no me·n fai desturbier,
		mas be m'a sa fe plevida
		et yeu iurat a mostier,
		don no·m puesc estraire,
	20	tan li suy fizels amaire
		ses falhir, so·ill iur e·ill pliu.
IV		Dormit a, si no·s rissida,
		en oblit un an entier,
		e no pretz,s'illa·m oblida,
	25	mais tot lo mon un denier.
		ara la·m gar sainz Salvaire,
		qu'om non la·m puesca sostraire
		ni per autre nom esquiu.
V		S'illa·m fai breu cossentida
	30	d'aquo dont ai dezirier,
		que la bays nud'o vestida,
		ia autra ricor no·n quier.
		assatz valh mais q'emperaire,
		si de sotz son mantel vayre
	35	iosta son belh cors m'aiziu.
VI		Blancha e grail' et escafida
		es, ses coratge leugier,
		doussa e fresqua colorida
		cum flors de may en rozier,
	40	corteza e de bon aire;
		e non suy de re guabaire,
		qu'assatz n'es plus qu'ieu no·n diu.
VII		Una gancha trassaillida
		me fon dig que·m fes l'autrier;
	45	s'es de bel mentir garnida,
		que mon ver fai mensongier,
		los forfaitz, qu'ieu non pres gaire,
		no vueill auzir ni retraire,
		c'om no m'aia per auriu;
VIII	50	Car si·n fauc fol' esbrugida
		e trop gran vertat l'enquier,
		si auran m'amor delida
		e vieillas e lauzengier.
		qui·s vol se·n fassa ianglaire,
	55	mas mi apel, quan repaire,
		son bon amic senhoriu.
IX		N'Eblon man ves Marguarida
		lo vers per un mesatgier,
		qu'en lui es amors iauzida
	60	de don'e de cavalier.
		et ieu soi sai aiustaire
		de dos amicx d'un veiaire:
		n'Aimon e'n L'Estrebesquiu.
X		N'Aimes e'n L'Estrebeschaire
	65	son dui amic d'un veiaire
		ab l'entrebeschiu.