Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 244,009 Autor: Guiraut d'Espanha Gènere: Canso Número: LXXIII

 

Pus era suy ab senhor

I	1	Pus era suy ab senhor
		qu'es de plazen captenensa
		e coms d'Anjous e d'onor
		e de pretz e de Proensa,
	5	e ioys e chantars l'agensa,
		chantarai del mal d'amor,
		que m'a tan doussa sabor.
		e ia guerir del mal d'amor no vuelh,
		ans m'abellis mays, on pus fort me·n duelh.
II	10	E d'esta doussa dolor
		no sap nulhs hom quon comensa
		mas quan li fin amador,
		a cuy platz qu'amors los vensa
		per forsa de benvolensa;
	15	et ieu viu d'aytal labor,
		que·ls mals prenc ab gran doussor.
		e ia guerir del mal d'amor no vuelh,
		ans m'abellis mays, on pus fort me·n duelh.
III		Tant es la dolors plazens
	20	que·l dous mals d'amor mi dona,
		per que mos cors franchamens
		de gen servir s'abandona
		a la covinen persona
		dont anc iorn no fuy iauzens
	25	ni per maltrach recrezens.
		e ia guerir del mal d'amor no vuelh,
		ans m'abellis mays, on pus fort me·n duelh.
IV		Mas mos fis cors e mos sens
		quascus ab son par tensona;
	30	e·l sens es desavinens,
		que·l cor blasma e ochaizona;
		quar ama, lo malrazona;
		e·l cor es sobriers e vens
		lo sen tan adrechamens.
	35	e ja guerir del mal d'amor no vuelh,
		ans m'abellis mays, on pus fort me·n duelh
V		Totz hom qu'ab fin cor leyal
		am ni s'enten en amia,
		vol mais soffrir lo dous mal
	40	per amors, que se·n gueria;
		tant es plazens malautia;
		mas selh que d'amor non cal,
		no pot tant valer ni val.
		e ja guerir del mal d'amor no vuelh,
	45	ans m'abellis mays, on pus fort me·n duelh
VI		Tostemps serau mey iornal,
		aitant quant ieu ja vius sia,
		en amor servir ab tal
		coven que ja trichairia
	50	non aura de la part mia;
		e prec mon belh Proensal
		qu'al sieu port amor coral.
		e ja guerir del mal d'amor no vuelh,
		ans m'abellis mays, on pus fort me·n duelh.