Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 203,001 Autor: Guillem d'Anduza Gènere: Canso Número: LIV

 

Sens ditz que·m lais de chantar e d'amor

I	1	Sens ditz que·m lais de chantar e d'amor,
		foldatz que chant et en amor m'entenda,
		et ieu no sai vas qual d'amdos m'enprenda;
		pero iovens sec ades la folor,
	5	per qu'ieu segrai, vueill'o no, la foldat
		si com destreitz e forsatz per ioven,
		quar ab folor cueill hom lo meillor sen;
		donx, si folei, no·m deu esser blasmat;
II		Qu'ieu sec mon cor co.l vela.l ven que cor,
	10	que·l cor no vol que fas' autra fazenda
		mas sol d'amor, que·m pot esser esmenda
		dels tortz, dels dans, del mal, de la dolor
		qu'ieu ai per vos, pros dona, sufertat,
		pos anc vos vi, c'autra nuill ioi no·m ren;
	15	e si merce ab vos non truep breumen,
		muer, e prec dieu que·us perdo lo pecat.
III		Plus fon mon cor que neus per gran calor,
		e plus que fuecx m'es avis que·s comprenda.
		sabetz per que? — dreitz es razos s'entenda —
	20	per vos, c'avetz sobre totas valor,
		beutat e sen, ensenhamen e grat,
		qu'ieu cre, si vis vostre cors grail'e gen
		Ypolite, que visquet castamen,
		fora Floris de cor enamorat.
IV	25	C'anc tals beutatz no fo mais ses amor,
		be·m meravill com es que no s'essenda
		en vos amors, qu'es genser ses contenda
		c'anc fos ni es; e son gualiador
		vas me mei hueill; e s'ill m'an galiat,
	30	ill prendon part en lur gualiamen,
		que tals traï qu'es traitz el traïmen;
		donx, s'ill m'an trait, ill compron la foudat.
V		Mas ieu cre be, aiatz beutat maior
		qu'als hueils non par, el cor; que no despenda
	35	sa gran beutat, greu er que no·s reprenda,
		quan faillira de sa fresca color;
		donx no mostretz encontr'umelitat,
		si·us platz, ergueill, quan plus bas deisen;
		pero em patz sufrirai lo turmen
	40	tro digon tug, per sofrir l'ai iogat.