Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 289,002 Autor: Cavalier Lunel de Monteg Gènere: Canso Número: LXXXIV

 

Si com lo jorns mot clars e resplandens

I	1	Si com lo jorns mot clars e resplandens
		cominalmen platz may que·l jorns plujos,
		tot enayshi vostre cors gracios,
		dona gentils, platz mays a tropas gens
	5	que res del mon, quar en vos resplandish
		fina beutatz, que·us fay tan gracioza
		que totz aymans vos miran s'esjausish,
		don say que·n es manhta dona giloza.
II		E com del ram, can n'ieysh la flors holens
	10	e de la flor yesh fruytz mot saboros,
		tot enaishi fis aymans pren de vos
		hodoran gaug, dona, tant etz plasens,
		qu'en vos lauzors e pretz e joys florish,
		don yesh honors e vida fructuoza,
	15	per que sabers am deport s'espandish
		per tot lo mon, flors humials amoroza.
III		Com dinss la mar esta l'aygua vivens
		que no y defalh ni fec lhunas sazos,
		tot enayshi vostre cors es hondos
	20	de gaugz, de joys, de sabers e de cens,
		que·ls fis aymans cascun jorn avantish
		pros es humils, e lhun temps no s'espoza,
		ni per donar say ni lay no tarish,
		car de valor etz guaya mars hondoza.
IV	25	Si com deu trop esser us homs dolens,
		can petit sap, es esta fort doptos,
		e deu parlar davan clercx autoros
		de gran saber, aishi fort soy temens
		es ay gran dol, per que mos cors marish,
	30	car dech preyar vos, qu'etz tant poderoza,
		mas no se ges, que sabers me falhish,
		qar de gran cen veg qu'etz trop autoroza.
V		Com del solhelh, qu'es mot clars e luzens,
		hem per sos rays enluminat sa ios
	35	e jes no·l pot corrompre locx brumos,
		tot enaishi, dona pros avinens,
		vostra beutatz los aymans esclarsish,
		don so joyos, menan vida pompoza,
		mas jes per so vostre pretz no·s delish,
	40	can mal vos ditz l'avols gens envejoza.
VI		Per que tostemps am totz mos pessamens,
		cors avinenz humyls isnels e pros,
		vos hondraray coma fizels e bos,
		e guardaray totz vostres mandamens,
	45	car en vos res lhun temps no s'escursish,
		dona prezans, de far totz bes ginhoza
		tant que la gens de far be s'afortish,
		car ve de vos qu'etz tant meravilhoza.
VII		Mos Bels-cristalhs, lo meu cor s'adurmish
	50	de gran plaser, miran vos, qu'etz andoza.