Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 366,004 Autor: Peirol Gènere: Canso Número: CX

 

Be·m cujava que no chantes oguan

I	1	Be·m cujava que no chantes oguan,
		sí tot m'es grieu pel dan qu'ai pres, e·m peza
		que mandamen n'ai avut e coman
		d'on tot mi plaz: de midons la marqueza.
	5	e pus a lieys ai ma chanso promeza,
		ben la dei far cuenhd' e guay' e prezan,
		quar ben conosc que, si·l ven en talan,
		qu'e mans bos locs n'er chantad' ez apreza.
II		Apreza n'er, mais ieu no sai cum chan.
	10	quom pus hi ai tota ma ponha meza,
		a penas puesc far ni dir belh semblan,
		tant s'es ira dins en mon cor empreza,
		que, si a lieys, que a m'amor conqueza,
		non plai qu'em breu me restaure mon dan,
	15	ia de mos iorns no·m metrai en afan
		que ia per mi si' autra domn' enqueza.
III		Enqueza non, qu'en un loc solamen
		amiey ancse, e ia a dieu non playa
		que ia vas me fas' aital falhimen
	20	qu'autra·m deman e que de lieys m'estraya.
		tostemps l'aurai fin' amor e veraya,
		e son d'aitan el sieu bon chauzimen
		que, si per lieys non cobre iauzimen,
		hie·us pleu per me que iamais ioy non aya.
IV	25	Joy aurai hieu, s'a luj plaj, e breumen,
		qu'ieu cug e crey qu'ilh no vol qu'ieu dechaya,
		que per aisso mia no·m espaven
		qu'auzit ai dir que mal fai qui s'esmaya.
		a, doussa res, cuenda, cortez' e guaya!
	30	per vos sospir e plor e planc soven,
		quar no sentetz la gran dolor qu'ieu sen,
		ni ges non ai amic que la·us retraya.
V		Mas ieu retrai, dona, soven de vos,
		quan suy ab luy, cuj aus dir mon coratge,
	35	las grans beutatz e·ls vostres fagz tan bos,
		qu'a tota gen venon ben d'agradatge;
		. . . . . . . . . . . . . . . . . . . . . .
		tro que del tot me falho·ls companhos,
		qu'enaissi m'es lo parlars saboros,
	40	qu'autre conort non ai de mon dampnatge.
VI		Dampnatge m'es quar no suy poderos
		de lieys vezer, que ten mon cor en guatge,
		et estau sai, don totas mas chansos
		tramet ades, quar las vol, per uzatge
	45	ab Tot-mi-plaz, la belha d'aut paratge;
		e plagra·m pauc chans, si per luy no fos,
		mas qui lieys ve ni sas plazens faissos,
		no·s pot tener de ioy ni d'alegratge.
VII		En Tot-mi-plai, mout vos ai en coratge
	50	et am vos mout, ses totas ochaizos,
		qu'apres midons res non am tan quan vos,
		et es ben dregz qu'ilh n'aya l'avantatge.