Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,024 Autor: Cadenet Gènere: Deux coblas Número: IV

 

S'ieu trobava mon compair'en Blacatz

I	1	S’ieu trobava mon compair’en Blacatz,
		un bon conseill leial li donaria
		(mas per mon grat ses conseill o faria) :
		qu’enanz qu’el fos del segle trespassatz,
	5	s’en departis, que·l temps que n’es passatz,
		no·il fara ges al major ops secors,
		anz ai paor qu’inz en enfern no·l pegna,
		si tan no fai qu’a Jesu Crist si vegna,
		que l’ufana d’aquest segl’e·l lauzors
	10	es en l’autre marrimenz e dolors.
II		Mais deu esser savis hom encolpatz
		qe·l fols, qan faill, e plus, si no·s chastia,
		qe·l fols qan faill, l’escusa sa folia,
		mas lo savis non es ges escusatz,
	15	ans l’acusa sos sens, qan fai foldatz ;
		qar qui conois los sens e las folors
		e vol mais mal qe be, Deus vol qe·il veigna,
		e si mal vol tener, Deus vol qe·l teigna.
		En Blacaz er tan leu al cap del cors
	20	qe·l degr’oimais castiar sol paors.