Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,035 Autor: Giraut de Bornelh Gènere: Canso Número: XXXIV

 

Tot gen m’estav’e suau et en patz

I	1	Tot gen m’estav’e suau et en patz
		Tro·l jorn c’amors entret en mo coratge ;
		Qu’eu non amava ni non er’amatz
		Ni·m sentia d’amor mal ni damnatge.
	5	Era no sai qu’i s’es ni se deve,
		Qu’eu am cela quez ilh no m’ama re
		E si·n tenh eu tot can ai en bailia
		E tot lo mon, si fos meus, en tenria.
II		Lo cor en tenh en loc d’altras rictatz
	10	E mas chansos en loc de vassalatge
		E, s’eu fos reis ni ducs ni amiratz,
		Fera rics fachs per s’amor e barnatge
		E, car non ai lo poder que·m conve
		A leis servir, eu ai ma bona fe
	15	E bona fe, qui be la conoissia,
		Degra prender en loc de manentia.
III		Be sui manens del maltrach que·m donatz
		Sofrir en patz, Dens m’en don alegratge !
		E sui paubres, can vos no m’esgardatz
	20	Et als altres d’ entorn fatz bel vizatge
		E me que·us am non esgardatz per be
		Et eu domnei mais que no m’enconve
		E s’eu quer so c’a me no·s tanberia,
		Forsa d’amor m’i fa dir la folia.
IV	25	C’aissi m’espert, can vei vostras beltatz,
		Com lo conhatz de Galvan per salvatge ;
		Can per guerra n’ac totz sos filhs menatz
		E sa filha queria per oltratge,
		El endema rendia la·lh ab se,
	30	Entro qu’Ivans los defendet, e me
		Defend’ab vos merces e cortezia !
		E si voletz ja re guirens no·m sia ?
V		Dels lauzengers me tenh molt per pagatz —
		So que no fai om mais, de me l’engatge —,
	35	Car m’an faidit del païs on estatz !
		Qu’en tan m’ era lo vers Deus d’agradatge
		Qu’eu fora mortz ; que fis amics can ve
		So c’ama fort e l’altra pro no·i te,
		Mor de dezir, don volh mais que m’aucia
	40	Amors sai lonh que lai si non l’avia !
VI		Aver ? No posc, que tan i a de be
		E de beltat c’a fugir m’en ave !
		E ses domna serai tan can viuria ?
		Si vos non ai, e qu’eu ses domna sia !
VII	45	Pro contessa que Proensa mante
		E tot lo mal i fai tornar en be,
		Chaps etz de pretz e chaps de cortezia,
		Per qu’en val mais Savoi’e Lombardia !