Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,028 Autor: Marcabru Gènere: Vers Número: XXVIII

 

Lanquan fuelhon li boscatge

I	1	Lanquan fuelhon li boscatge
		E par la flors en la prada,
		M'es belhs dous chanz per l'ombratge,
		Que fan desus la ramada
	5	L'auzelet per la verdura ;
		E pus lo temps si melhura,
		Elh s'an lur joya conquiza.
II		Ara perdon l'alegragge
		Pel frey e per la gilada ;
	10	Mas ieu ai pres tal uzatge :
		Totz iorns chant, qu'ara m'agrada ;
		E fassa caut o freidura,
		Trastot m'es d'una mezura
		Amors e Joys, d'eyssa guiza.
III	15	On plus n'ay meilhor coratge
		D'amor, mielhs m'es deslonhada,
		Per qu'ieu no·m planc mon dampnatge ?
		Qu'aitals es ma destinada
		Que Joys e Bon'Aventura
	20	Mi tolh un pauc de rancura
		Que m'es ins el cor assiza.
IV		Selha que·m degra messatge
		Enviar de ss'encontrada,
		O tem bayssar son paratge,
	25	O s'es ves mi azirada,
		O no vol, o no endura,
		Ben leu Orguelhs, o Non-Cura
		S'es entre nos entremiza.
V		Ges no·l sera d'agradatge
	30	La merces qu'ieu l'ai clamada.
		S'ieu lieys pert per son folhatge,
		Ieu n'ay autra espiada,
		Fina, esmerada e pura,
		Qu'aitals amors es segura
	35	Que de fin joy es empriza.
VI		Per lieys am tot son linhatge
		E totz selhs que l'an lauzada,
		Quar anc no·m fes estranhatge,
		Mas quora·m vi, fon privada.
	40	Quar ieu l'am senes falsura,
		Ja no·m deu esser escura
		D'aquo don tan l'ay enquiza.
VII		Be·m tengratz per folhatura,
		Si be·m fai e mielhs m'ahura,
	45	S'ieu ja m'en planc quar l'ai viza.