Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,001 Auteur: Bertolome Zorzi Genre: Canso Numero: XVII

Aissi col fuocx consuma totas res

I	1	Aissi col fuocx consuma totas res,
		Consuma amors el cor, ois denha assire,
		Tot pensamen quelh pogues contradire,
		Tro que del tot al cor vencut e pres ;
	5	Per que mos cors contradir noi pot ges,
		Qu’el es en lui assis ab tal esfortz
		Que si tot eu m’era ab lui acordatz
		Pel dan quem fetz antan la dura mortz
		De laissar chan et amoros solatz,
	10	Ops m’es qu’er chant e sia enamoratz.
II		Pero d’aitan puosc dir que m’es ben pres,
		C’amors m’a faich tant plazen dompna eslire
		C’a dreich ne pot totz hom esser chausire
		Cum en lieis es complidamen totz bes,
	15	Qu’il es tant pros, francha, bella e cortes,
		C’aissi cum es d’un fruich gensatz un ortz,
		Es lo segles de leis totz enansatz ;
		Qu’en leis reviu jois, dompneis e deportz,
		Que moriron, quand fui del gaug mermatz
	20	Qu’en lieis m’er gen, s’a dieu platz, restauratz.
III		E car aten que mon gaug restaures,
		Ben dei ponhar d’esser adreich servire,
		Per qu’ai pausat mon cor e mon desire
		En far e dir tot so qu’a lieis plagues.
	25	Mas si ja fos que grazir lom denhes,
		Tot atressi cum guida rics conortz
		Cellui qu’en mar es a perilh estatz,
		Quan ven en luoc on aisitz l’es bons portz,
		Guideram gaugz e conortz da totz latz
	30	Et seriam de tot mal eslonhatz.
IV		Mas si nois tanh que grazir lom degues,
		Per mercelh prec que mos digz non l’azire,
		C’aissi cum es de quant dieus vol grazire
		Rendutz qu’estai penedens e confes,
	35	Enten grazir tot quant fairem volgues,
		Qu’estiers fora trop sobranciers mos tortz,
		Car de l’afan qu’en s’amor fos donatz
		Seria honratz cel cui s’atanh Guisortz,
		Tant sobreval sos adreitz cors prezatz,
	40	Per que m’es bel tot aisso qu’a leis platz.
V		Qu’ab tal voler sui a lieis servir mes
		Que d’als non ai penssamen ni cossire,
		Mas cum pogues tant per lieis far e dire
		Qu’en retener mi per sieu s’acordes.
	45	E del mais fos cum a lieis agrades ;
		Car sol fos faitz en lieis aitals acortz,
		Aissi cum es senes par sa beutatz,
		Volria amors c’a mi vengues la sortz
		D’eser de joi senes par avondatz
	50	E sobre totz fins amans afinatz.
VI		Pero tals m’a ses tot aisso conques
		Quem plagra neus si ‘lam volia aucire,
		Per qu’eu nom planc, si ‘lam fai greu martire,
		Ben c’a morir m’en avenra, som pes,
	55	Si no m’en val chausimens ni merces ;
		Car mi destrenh us desirs qu’es tant fortz
		Qu’ieu sui aissi de paor tormentatz,
		Cum tormenta temenssa e desconortz
		Lo faisan qu’es en tal albre pausatz
	60	On ve l’austor qui es sobremontatz.
VII		Ai ! pros dompna sobrevalens, nous pes
		Si ‘naissius sui de m’amor descobrire,
		Qu’estiers non puosc de mort esser gandire,
		Tant m’a greumen mos desirs sobrepres ;
	65	Car en vos a so qu’estort m’agra ades,
		Sol vos preses d’omilitat recortz,
		Per c’atressi cum malautes grevatz
		Quier lai socors don pot esser estortz,
		Vos clam merce per dieu e per pietatz
	70	Que de la mort estorser mi dejatz.
VIII		Amors, breumens serai jojos o mortz,
		Tant fortz desirs avetz en mi pausatz,
		Mas car convens totas res vostr’ esfortz,
		En bon esper m’en remanc conortatz,
	75	Car segon dreich valer m’en deuriatz.
IX		Si bem desplai trop mais anta que mortz,
		Per vos, dompna, ai covens e digz passatz,
		Car vos etz pretz, capdels, valors e portz,
		Sens et abrics, estatges e beutatz,
	80	Per qu’ieu non puosc a dreich esser blasmatz.