Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 356,009 Auteur: Peire Rogier Genre: Vers Numero: 5

Tant ai mon cor en ioy assis

I	1	Tant ai mon cor en ioy assis,
		per que no puesc mudar no·n chan,
		que ioys m’a noirit pauc e gran ;
		e ses luy non seria res,
	5	qu’assatz uey que tot l’als qu’om fay
		abaiss’ e sordey’ e dechai,
		mas so qu’amors e ioys soste.
II		Lo segles es aissi deuis
		que perdut es quant l’auol fan,
	10	mas ab los pros uay pretz enan ;
		et amors ten se ab los cortes,
		e d’aqui son drut cuend’ e guay,
		perque·s te ioys que tost non chai,
		qu’estiers d’els mais hom no·l mante.
III	15	Si·l ioys d’amor no fos tan fis,
		ia non agra durat aitan,
		mas no y a d’ira tan ni quan,
		que·l dans n’es pros e·l mals n’es bes
		e soiorns, qui plus mal en tray ;
	20	demandatz cum ! qu’ie·us o diray :
		quar apres n’aten hom merce.
IV		Pauc pren d’amor qui no sofris
		l’erguelh e·l mal e·l tort e·l dan,
		qu’aissi o fan silh que re n’an ;
	25	guerra·m sembla, qu’amors non ges,
		quan son li mal e sai e lai,
		e non ai dreg e·l fieu qu’ieu ay,
		s’al senhor don mou, mais en ue.
V		Amors ditz uer et escarnis,
	30	e dona pauza e gran afan
		e franc cor apres mal talan ;
		huey fai que platz, deman que pes. —
		e doncx que·n diretz qu’aissi uay ? —
		que costa ? que tot torn’ en iay,
	35	pueys apres no y a re mas be.
VI		Membra·m aras d’un mot qu’ieu dis. —
		e qual ? — non uuelh qu’om lo·m deman. —
		no l’auzirem doncx ? — non onguan ;
		no·us er digz ni sabretz quals es. —
	40	no m’en qal, qu’atressi·m uiuray. —
		si·us uiuetz o·us moretz, so say,
		no costa re midons ni me.
VII		Mon Tort-n’auetz en Narbones
		man salutz, si tot luenh s’estai,
	45	e sapcha qu’em-breu la ueyray,
		si trop grans afars no·m rete.
VIII		Lo senher, que fetz tot quant es,
		salu e guart son cors cumsi·s fay,
		qu’ilh mante pretz e ioy ueray,
	50	quan tot’ autra gens s’en recre.