Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 075,004=263,001 Auteur: Bertran , Javaré Genre: Échange de coblas Numero: App. C, 4

Jauare, anc a merchat

I	1	Jauare, anc a merchat
		Non ui hom gazagnar perdeu,
		Mas uos enn’aiatz bon grat
		Qe·us fe lo colp del feramen,
	5	Qar poiatz n’es de ualor ;
		E qi·us tolges la lusor,
		Foraitz en alt grat poiatz ;
		E pois perden gazagnatz
		Qi·us fezes la lenga traire
	10	Cre qe foses emperaire.
		A pauc non dic qe, se foses pendutz,
		Qe uns cors sanz uos foses deuengutz.
II		Pois me uedez meliorat,
		En Bertram, en dechazemen,
	15	Part uos don de mon barat,
		Qe anc en uos non ui bon sen ;
		Qar caualer trobador,
		Pois ab armas nan son cor
		Et nostre mestier li plaz,
	20	Taing uiua d’aital perqaz.
		E pois coblas sabes faire,
		E per gazagnar mal traire,
		En aital point si ez uos sai uenguiz
		Com eu lo iorn qan fui acoseguiz.