Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Code: 030,002 Auteur: Arnaut de Maruelh Genre: Canso Numero: V

A guiza de fin amador

I	1	A guiza de fin amador,
		ab franc cor humil e verai,
		viu sol del bon respieg d'amor
		jauzens, ab greu pena qu'en trai
	5	mos cors, per que la·m fetz chauzir
		dont hom non pot lauzan mentir,
		ni del be que·y es dire·l tertz.
II		Ges no l'aus mostrar ma dolor,
		estiers ad hora quans'eschai
	10	qu'ieu la vei, li dic a temor
		semblans per que sap be cum vai,
		e s'ieu en re mensprenc el dir,
		sobretemers me fai falhir,
		que fai humilhs los plus espertz.
III	15	Ai las ! que n'er, si no·m socor ?
		non als mas deziran morrai —
		e donc aura hi gran honor,
		si, per so quar l'am, mi dechai ;
		ilh en pot ben son cor complir ;
	20	mas non l'er, segon mon albir,
		apres me nulhs amics tan certz.
IV		Tot ades soplei et azor
		al païs on ma don' estai ;
		e·n tenria neis per senhor
	25	un pastor que vengues de lai.
		Empero negus no·s cossir,
		que·l castelhs, on se fai servir,
		ja sia per me descubertz.
V		Chanso, vai t'en a la melhor,
	30	e di·l qu'eu·l clam merce, si·l plai ;
		quan cossirara sa valor,
		li membre del fin cor qu'ieu l'ai ;
		que si·m lais Dieus s'amor jauzir,
		semblaria·m, tan la dezir,
	35	ab lieis paradis us dezertz.
VI		Pueis diguas a mon Ben S'Eschai
		qu'en tal son pauzat mei dezir,
		si·l puesc' a son plazer servir,
		de ric guizardon serai certz.