Jeanroy, Alfred; Aubry, Pierre. Huit chansons de Bérenger de Palazol. "Anuari de l'Institut d'Estudis Catalans", 2 (1908), pp. 520-540.

Code: 047,001 Auteur: Berenguier de Palazol Genre: Canso Numero: III

Ab la fresca clardat

I	1	Ab la fresca clardat
		Que mou del temps sere,
		Dona, et ab l'estat
		Que renovela e ve
	5	Ai tot mon cor pauzat
		[En la vostra merce,]
		E quar tant ai estat
		Que vezer no·us volia,
		Si la colpa es mia,
	10	Et ieu m'o ai comprat.
II		Mas tant ai sofertat
		Gran dezir e sai be
		Que si m'avetz desgrat
		A mon tort s'esdeve,
	15	Dona, e per ma foudat
		Quar d'amic no·s cove
		Qu'el truep si dons irat
		Per nulha fellonia,
		E fols hom no·s castia
	20	Ans a trop mescabat.
III		Be m'avi' acordat
		Qu'al cor vires lo fre,
		Mas quan vey la beutat
		E·l belh cors blanc e le,
	25	Graile, gras e delguat,
		E·l plus azaut qu'om ve
		E·l mielhs afaissonat,
		Totz mon cor se cambia
		Que de vos no·s partria
	30	Per nulh autr'embayssat.
IV		Tan n'ai grant voluntat
		E tant hi vey de be
		E tan mi ve per grat
		Qu'ie·us am per bona fe,
	35	E tan m'avetz trobat
		Ab leyal cor ancse
		Que vos avetz comtat
		Qu'ie·us aya ad amia
		Per plana drudairia,
	40	O·y auriatz peccat.
V		Per vos ai oblidat,
		E non per altra re,
		Tot quant avi'amat,
		Que de pauc mi sove ;
	45	Si ai per vos camjat,
		Camjatz, dona, per me
		Vostre cors abdura[t],
		Vulhatz ma companhia
		Aissi cum ieu volria
	50	Vos e vostr'amistat.
VI		Me avetz, En Bernat,
		En vostra senhoria
		Mielhs qu'om ja non auria
		Ren que agues comprat.
VII	55	Chanso, a Na Maria
		Diguas qu'ieu chantaria
		Si·n sabi'aver grat.