Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,009 Auteur: Lanfranc Cigala Genre: Canso Numero: XLVIII

Ges non sui forzaç q'eu chan

I	1	Ges non sui forzaç q'eu chan,
		Q'amars non m'a em poder
		E ren [als], al meu parer,
		No·m pot far força de chan;
	5	Mas per tan
		Non taing, segon ma semblança,
		Laissar ioi ni allegranza
		Ni solaz,
		Anz m'agrada mais e·m plaz
	10	Q'eu chan, pos forçaç non sui
		Per ioi de me ni d'autrui.
II		Dreiz es q'eu d'amor non chan,
		Tant pauc vol als seus valer,
		Car midonz ab fin prez ver,
	15	Don eu daurava mon chan,
		Ben estan,
		Laiset morir, don pesanza
		Ai tal cum laus sa condanza!
		Mas solaz
	20	Retenc e ioi, car mi plaz,
		Car qi ioi ni solaz fui
		A peich de mort se condui.
III		Mas eu, car voilh viure, chan
		E n'ai sivals mon plaçer,
	25	. . . . . . . . . . . . . . . . . .
		D'aisso prez eu mais mon chan;
		Ed on an
		Li croi mais de malenança
		E·lh nuaillios, mais s'ennança
	30	Mos solaz,
		E dic vos qe fort me plaz
		Can lor es greu ni fan brui
		De mi, cant eu mi desdui.
IV		Pero eu sai ben s'eu chan
	35	Pauc m'en volran grad saber,
		Eç eu be pauc lo n'esper
		Tant pauc so cil c'amon chan,
		Mas chantan
		Dic eu qe non es onrança
	40	Ses ioi, ni gran beninança
		Ses solaz.
		S'uns totz sols, cui iois non plaz,
		Tot lo mon cargha d'enui,
		Gardaz qe podem far dui!
V	45	E qar am ioi, de ioi chan,
		E ab ioi voilh remaner,
		E ioios mon cor aver,
		E de ioi daurar mon chan;
		E s'aman
	50	Estei anc en greu balança
		Ni·m failhit lonc'esperança
		De solaz,
		Ar ai ioi, de qe mi plaz,
		Q'eu eis, ses amor, m'adui,
	55	E soi plus rics c'anc non fui.
VI		Qi solaz
		Ama ni cui fis iois plaz,
		Chant mon cantar qe s'adui
		Als pros e dals avols fui.