Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Code: 370,010 Auteur: Perdigon Genre: Canso Numero: VIII

Mais no·m cug que sons gais

I	1	Mais no·m cug que sons gais
		ni motz plans ni ginhos
		sapia far, quar l'esmais
		e·l sospirs angoissos
	5	d'amor m'an si camjat
		e·l saber esserrat
		que res no sai que·m dic ;
		eissi mi notz paors
		en aquestas errors
	10	e desirs e volers
		e cujars e temers.
II		Pero no·m ditz volers,
		sitot si·m venz folors,
		qu·eu de totz mos dolers
	15	fass’ a mi dons clamors ;
		car per aisso m'en gic
		qu'aug dir qu'anc no·s jausic
		drutz d'amor a celat
		qui·s fezes trop cuchos
	20	ni·s demostres gelos ;
		mas ab totz los esglais
		puin com ab jois m'apais.
III		Ni convinentz ni plais
		que si' entre nos dos
	25	no·l cug querre ja mais,
		si be·m viu cossiros,
		que·l braus respos irat
		ab semblan de comjat
		on per pauc no moric
	30	m'a mes en tals temors
		que no m'es mais sabors
		de nuils coventz querer,
		que·m remembr' aquel ser.
IV		Anz lais al seu plazer
	35	mos gaugs e mas dolors,
		mas ja·m par desesper
		lo desirs e l'amors
		qui·m parec, can plevic
		que·m fezes de joi ric ;
	40	pus en tan gran desgrat
		se tenc cel qu'es cochos
		de so don muir aissos,
		qu'ab tals covens m'estrais
		qu'anc leials cors no frais.
V	45	Si·l ditz non es verais,
		don es ma sospeissos,
		solatz e chantar lais
		e totz faitz amoros,
		car en sa segurtat
	50	m'aura mort e sobrat
		cil qui m'a fin amic,
		si·m tarda·l seu socors ;
		qu'amics, qu'ilh ten aussors
		e·l tol sos bos espers,
	55	mor d'aquels mals sabers.
VI		De lui on es pretz vers
		e complida valors,
		tem que·s luin mos vezers
		per fals lausengadors,
	60	on descobre l'esdic
		e mon senhor chastic,
		n'Uc, que Dieus ten honrat
		sobre·ls autres baros,
		que·s gard de lurs sermos,
	65	qu'a lor es honor fais
		et avolesa jais.