Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Code: 370,015 Auteur: Perdigon Genre: Chanson religieuse Numero: X

Verges, en bon'hora

I	1	Verges, en bon'hora
		portes lo Salvaire,
		que selh vos honora
		e·us fai joia faire,
	5	e·l pobol que fora
		liuratz a maltraire
		vos pregues ahora,
		santa plazen maire ;
		quar d'ir'e d'esmai
	10	e de tot esglai
		guardatz lo pus laire
		que vas vos s'atrai.
II		Domna doussa e bona,
		humil, de bon aire,
	15	ajud'e perdona
		ad aquest peccaire ;
		guarda ma persona
		d'ant'e de mal faire,
		e m'arma razona
	20	ab lo tieu car paire ;
		que·ls peccatz qu'ieu ai
		fatz ni ditz ni sai
		no·m puescan mal faire
		quan del segl'irai.
III	25	De gracia plena,
		avetz nom Maria,
		car getatz de pena
		cui merce vos cria ;
		liam ni cadena
	30	no·l te ni·l tenria
		pus qu'ab quarantena
		gen vos humilia ;
		penedensa fai
		hom just e verai,
	35	e per aital via
		va senes esmai.
IV		Regina d'auteza
		e de senhoria,
		la vostra franquesa
	40	a·l mon en bailia ;
		de tota boneza
		etz roz' espandia,
		car en vos s'es meza
		gracia floria,
	45	aissel frug verai
		qu'intret ab lo rai
		en vos, dona pia,
		quan l'angel venc sai.
V		Verges, en efansa
	50	nasquet lo dous Sire
		de vos ses duptansa
		de qui sui servire ;
		la sua pitansa
		mi fassa jauzire
	55	ab gran alegransa
		dels bes qu'ieu dezire,
		car gran dezir ai
		qu'ieu fos el renc lai
		senes tot cossire
	60	on sanh Peir'estai.