Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,001a Auteur: Guillem de Cabestaing Genre: Canso Numero: I

Al plus leu qeu sai far cansos

I	1	Al plus leu qeu sai far cansos
		cō cel que daura et estaingna
		mi empren eras mas doptos
		sol mos sabers nom soffraingna
	5	mas per tal mi plaz esaiar
		com leu chansoneta fezes
		car so chant om mais qe menz car
		per qeu ual planan mon chantar
		descurs diz com leu aprezes.
II	10	Lonc temps ai amat en perdos
		no pusc soffrir no men plaingna
		e no sai per cals ocaisos
		mas ben esperan gazaingna
		per qeu naten mas tart me par
	15	que leis que mes del cor plus pres
		fas amors tant humiliar
		qem don ioi car nom pod uedar
		queu no lam ab quill nom ames.
III		Ges damar leis un an o dos
	20	nō plaing si tot mes estraingna
		coras e iorz e temps e sasos
		et amors tem quem soffraingna
		canc puois la ui per nuill pensar
		non fo qinz el cor nom estes
	25	sos semblanz per qeu la ui clar
		elam fe pels oillz passar
		sa beutat qe toz temps mires.
IV		Soven remire sas faissos
		camors mi ten en greu laingna
	30	e nom par ni cre qe anc fos
		uas re de mala compaingna
		mas uas me qe ges desamar
		no la puosc per dan qem prezes
		quel mals mes dolz a soffertar
	35	per qel bes mer a merceiar
		queu naten mas no mo tardes.
V		De leis seruir sui uoluntos
		cal meinz ateing cuiz men taingna
		qen mainz luocs es seruirs bos
	40	eras ai trop dit remagna
		cab fil de son mantel uar
		sa leis fos plazem qem dones
		me feira plus iauzen estar
		e mais qe nom pogra far
	45	autra del mon cab sim colgues.
VI		Fis amics desauenturos
		ab pauc de ioi ses mesclagna
		messoniers de messonias blos
		eschius plus causels de saingna
	50	per vendre o per donar
		uos ai estat e sius plagues
		degrab uos merce trobar
		domna puois als nom uoles far
		suffrez qeus uis eus preies.
VII	55	Chansos tu miras saludar
		celui qe mes del cor plus pres
		e dires lim senes doptar
		que cuig malleon demostrar
		plus leu dun falco yrlandes.