Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 314,001 Auteur: Guillem de Cabestaing Genre: Canso Numero: II

Assatz es dreig pois iois nom pot uenir

I	1	Assatz es dreig pois iois nom pot uenir
		de ren quer am nil nol uen a plazer
		que diga toz cous deuez captener
		uos amadors que amatz per figura
	5	sias humils et adreig et acli
		et eu dic o canc pron non tenc a mi
		mas ger per tan mos plains nous espauen
		qe pro aurez sim creses loniamen
		que meins ni a que noi uai per mesura
II	10	E nuills deleigz non pot esdeuenir
		nuills bruitz amans saisi non sec lesper
		cam la bruna per miels far son uoler
		e lamics ros la rosa per natura
		que chascus ioi couen agisti (?)
	15	et eu dic o per zo com sen casti
		ni li cocham ab cels queu uan ab sen
		que si o fan non es lamistaz pura.
III		E mais despleitz uos dirai per iausir
		queu seran bon sil saubes retener
	20	domna iouen non enqueraz de ser
		quel sens li creis e la fes li meillura
		ni la de iorns non preies mati
		mas ueirol ser cant le soleis non ri
		e de trent ans a me dia faillen
	25	e doncçela ses marit en iacen
		cab la calor sabcorda la freidura.
IV		Car auiatz lieg pos enpres son en dir
		cant anares uostra donna ueser
		daus lo latz dreig uos anatz a seçer
	30	que li bel dig noi perdon lor dreitura
		car sius dic oc meils uos tenres per fi
		e sius digz non tenez uostre cami
		qel cor qe lai tan prim e uolen
		que non es om e sapchatz nous en men
	35	que iam pogues amor segura.
V		Qui es dreig que no sen partir
		tron comunals que non perdal sabers
		domnei per tot caissis porra tener
		que non penra tan gran descobritura
	40	cant longs amars troba omes nemsfi
		la longamen laceill tan sobre si
		e bona fes ten son dan en nien
		mas a lonc tems lemenda la tortura.
VI		Lo meus neleigz uos uolrai descobrir
	45	cai en amor e dirai non lo uer
		anc se fui seus que no men puosc mover
		et anc sen fo sa beuolens escura
		e gasardon non ai mais quem auci
		et es me bon pel respos del dui
	50	que diz al lop a la feda prenden
		mais te ualgron totas al forminen
		per aquest mot nesper bon auentura.