Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 029,006 Auteur: Guillem de Cabestaing Genre: Canso Numero: IV

Chanço doill mot son plan e prim

I	1	Chanço doill mot son plan e prim
		fas pos ar botolc li uim
		eill auchor sim
		so de color
	5	de magta flor
		e uerdeia la fuoilla
		eill chant eill braill
		son al ombraill
		dels aucels per la broilla.
II	10	Pels bruillz aug lo can el refrim
		e per co no men faza crim
		obri e lim
		moz de ualor
		ab art damor
	15	don non ai cor qem toilla
		anz si bem faill
		la sec atraill
		on plus uas mi sorgoilla.
III		Re no ual orguoillz damador
	20	cades trebucha so sengnor
		delloc auzor
		bas el terraill
		per tal trebaill
		que de ioi lo despoilla
	25	dreiz es lagrim
		et art e rim
		cel que damor ianguoilla.
IV		Bona dona uas cuy azor
		ges per orguoill non uau allor
	30	mas pel paor
		del diuinaill
		don iois trassail
		faç semblan que nos voilla
		quanc nonç iauzim
	35	de lor noirim
		mal mes que lor acuoilla.
V		Ar am fam damor don badaill
		e no sec mesura ni taill
		sols mo egail
	40	canc non auzim
		del tems caim
		amador mentz acoilla
		cor trichador
		ni bauador
	45	per que mos ios capduoilla.
VI		Si bem uau pertot ad esdaill
		mos pessamenz lac uos assaill
		qeu chan e uaill
		pel ioi quenz fim
	50	lai onz partim
		don souen loill me muoilla
		dir e de plor
		e de dolchor
		pro ai damor quim duoilla.