Appel, Carl. Poésies provençales inédites tirées des manuscrits d’Italie. "Revue des langues romanes", 34 (1890), pp. 5-35

Code: 094,001 Auteur: Lo Vesques de Basaz Genre: Canso Numero: [III]

Cor, poder, saber e sen

I	1	Cor, poder, saber e sen
		ai de chantar e d'amor
		e de servir gai seignor
		que prez e valor enten;
	5	q'esters es obra perduda,
		e «·ill mort son greu per garir»,
		e si·m volguesson auzir,
		mel traissera de secuda.
II		Bella dompn' ab cors plazen
	10	triat co·l grans de la flor
		am eu, del mont la genzor:
		que negun' ab leis no·s pren
		oilz de falcon trait de muda,
		bocha rien per ben dir,
	15	e·l cors plus dolz per sentir
		c'uns prims ranzans sus char nuda.
III		Bona dompna et avinen
		am, e no ges per amor,
		mas en luoc de bon seignor
	20	servirai son bel cors gen, -
		ar es tost causa saubuda, -
		e pren per luoc de iauzir
		qant li plai que·m faz'auzir.
		aitals, domna, vos saluda.