De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 217,004 Auteur: Guilhem Figueira Genre: Sirventes Numero: CXVIII

Ja de far nou sirventes

I	1	Ja de far nou sirventes
		No quier autre ensenhador,
		Que ieu ai tant vist et apres
		Ben e mal e sen e folhor
	5	Qu’ieu conosc blasme e lauzor,
		E conosc anta e honor,
		E conosc que malvat labor
		Fan Lombart de l’Emperador.
II		Quar nol tenon per senhor
	10	Enaissi quon deurian far ;
		E, s’ilh non repaira enves lor,
		En breu, per sas antas venjar,
		L’Enperi s’en poiria clamar
		D’elh e del sieu enperiar,
	15	Se laissa tolre ni mermar
		Lo dreit qu’elh deu adreiturar.
III		Si l’Emperaire reman,
		Que non cobr’er so qu’om li tol,
		Jamais de bon pretz sobeiran
	20	Non aura tan com aver sol,
		E doncx clars estic son lansol,
		Qu’ieu auzi dir a mon aujol
		Que qui non dona so quel dol
		Mantas vetz non pren so ques vol.
IV	25	L’Emperaire poderos
		A tan de sen e de saber
		Que, s’elh repaira enves lor
		Apoderat ab son poder,
		Ja nulhs non auzara mover
	30	Que non fassa tot son voler;
		E prec Dieu que m’o lais vezer
		A mon pro et al sieu plazer.